ქართული ოცნების ერთ-ერთმა ლიდერმა და დეპუტატმა, მამუკა მდინარაძემ დაასახელა 3 მიზეზი, რომლის გამოც უარს ამბობენ ზელენსკის პარლამენტში ჩართავზე.

1. მისი თქმით, ეს უხერხულობას ქმნის, როდესაც უკრაინის ელჩი გაწვეულია;
2. როგორც ჩანს, მმართველმა გუნდმა გადაწყვიტა ოპოზიციის არცერთ ინიციატივას არ შეხედოს სერიოზულად;
3. მდინარაძე ამბობს, რომ ასეთი გადაწყვეტილებები უნდა მიიღებოდეს ორ მთავრობას შორის.

"უხერხულობა"

მდინარაძე ფიქრობს, რომ ოპოზიციამ უნდა გაითვალისწინოს არსებული "უხერხულობა", როცა მსგავს ინიციატივას აყენებს. იქვე აცხადებს, რომ "როდესაც დემარშია ერთი მხრიდან და მეორეს მხრივ აყენებ [ინიციატივას], ეს სერიოზული უხერხულობა უნდა გაითვალისწინოს ყველამ". მმართველი გუნდის ლიდერი არ აკონკრეტებს, ვისი მხრიდანაა დემარში.

"არის ძალიან სერიოზული უხერხულობა, რომელსაც ხანდახან ფორმალურს უწოდებენ, ხანდახან პრაქტიკულს და რეალურს. უკრაინას, სამწუხაროდ, და მის ხელისუფლებას დღეს გაწვეული ყავს საქართველოდან ელჩი და ეს უხერხულობა ასეთი საკითხების დაყენების დროს, ალბათ უნდა გაითვალისწინოს ყველამ, რომ საკუთარ ქვეყანას მსგავსი უხერხულობები არ შეუქმნას", — ამბობს მდინარაძე.

იქვე დეპუტატი აღნიშნავს, რომ განმარტებებეს არ სთხოვენ არავის, მხარს უჭერენ უკრაინას პოლიტიკურად, ჰუმანიტარულად და "არ აიძულებენ" ომში მყოფი ქვეყნის ადმინისტრაციას განმარტებები აკეთოს ელჩის გაწვევაზე.

ჟურნალისტმა მას შინაგან საქმეთა მინისტრის ყოფილი მოადგილის, გიორგი ლორთქიფანიძის შესახებასც დაუსვა კთხვა, რაზეც მდინარაძემ თქვა, რომ ესეც "უხერხულობის" ნაწილია.

"ოპოზიციის ბინძური და მოღალატეობრივი კამპანია"

როგორც მამუკა მდინარაძე ამბობს, ნაციონალური მოძრაობისა და "მისი დანაყოფების" ინიციატივას მმართველ პარტიაში სერიოზულად არ უყურებენ. მდინარაძის აზრით, ოპოზიციის ინიციატივები ფილტრის ქვეშ უნდა გადიოდეს.

"ნაცმოძრაობის და მისი დანაყოფების რომელიმე ინიციატივა ოდნავ სერიოზულად მაინც რომ განვიხილოთ, დავანებოთ ინიციატივის შინაარსს ამ შემთხვევაში თავი, მათ ბოდიში უნდ ამოიხადონ იმ ჰიბრიდული ომისათვის იმ ბინძური და მოღალატეობრივი კამპანიისათვის, რაც აქამდე აწარმოეს. უნდა მიხვდნენ, რომ ბევრი მათი ე.წ. ნარატივი აზიანებს საქართველოს ინტერესებს და არა, როგორც მათ გონიათ, მხოლოდ ხელისუფლების ინტერესებს", — აცხადებს ის.

"ამ საკითხს მათ დალაგებულს ვერ განვიხილავთ"

დეპუტატმა ხაზი გაუსვა, რომ გადაწყვეტილებები ოპოზიციასა და რომელიმე ქვეყნის ხელისუფლებას შორის არ გვარდება და იქვეე დაამატა, რომ ასეთი საკითხები უნდა შეთანხმდეს 2 ქვეყნის ხელისუფლებებს შორის, დახურულ კარს მიღმა.

"ხატია დეკანოიძეს პირადი კონტაქტები, რაშიდაც აქვს უკვე გამოყენებული, უფრო სწორად, ნაცმოძრაობას პირადი კონტაქტები უკრაინაში და გავლენები რაშიდაც აქვთ გამოყენებული, ეს უკვე გაშიფრულია და ახლა ვითომ კეთილშობილური მიზნებისთვის გამოყენება პიარ და პოპულისტურ სვლებს თავი დაანებონ გაითვიცნობიერონ და გაათვიცნობიერონ, რომ ასეთი საკითხები გვარდება 2 ქვეყნის ხელისუფლებას შორის. ბუნებრივია ამ საკითხს მათ დალაგებულს ვერ განვიხილავთ", — თქვა მდინარაძემ.

ამ მიზეზების ჩამოთვლის შემდეგ, ჟურნალისტმა დეპუტატს ჰკითხა, თუ ელჩი დაბრუნდება თავის პოზიციაზე, რა გადაწყვეტილებას მიიღებს მმართველი გუნდი ზელენსკის მიმართვაზე. მდინარაძემ პირდაპირ არ უპასუხა და თქვა, რომ მან არა 1, არამედ 3 მიზეზი დაასახელა.

"არ დგას ეს საკითხი დღეს დღის წესრიგში. თუ საჭიროება იქნება, თუ რაღაცა ეროვნული ინტერესი იქნება ამისი... არაფერი ამის იქით მე არ წავალ. იმიტომ ვსაუბრობ დახურულ კარს მიღმა კონსულტაციებზე, თუ ასეთი როდესმე დადგება და აუცილებლობა იქნება, მაშინ ვილაპარაკოთ, ეს არ არის ოპოზიციის დასაყენებელი საკითხი", — უთხრა მან ჟურნალისტებს.

მანვე აღნიშნა, რომ ის ქვეყნები სადაც ზელენსკის მოუსმინეს, ნატოსა და ევროკავშირის წევრები არიან, საქართველოს 20% კი ოკუპირებულია რუსეთის მიერ. მან მოუწოდა და ურჩია ჟურნალისტებს, რომ ეს კონტექსტი არ დაავიწყდეთ.

გუშინ, 17 მარტს პარტია ლელო ინიციატივით გამოვიდა, უახლოეს დღეებში საქართველოს პარლამენტში სიტყვით გამოსვლისთვის მოიწვიონ უკრაინის პრეზიდენტი ვოლოდიმირ ზელენსკი. დეპუტატ სალომე სამადაშვილის თქმით, ეს იქნებოდა ყველაზე სწორი ნაბიჯი ჩვენი მხრიდან პოლიტიკური მხარდაჭერის დემონსტრაციისთვის და იმის საჩვენებლად, თუ სად დგას საქართველო.

ნაციონალური მოძრაობის ერთ-ერთი ლიდერის, ხატია დეკანოიძის განცხადებით კი უკრაინის პრეზიდენტის ადმინისტრაცია მზადაა, ვოლოდიმირ ზელენსკი საქართველოს პარლამენტში ჩაერთოს და ქართულ საზოგადოებას მიმართოს.

პარლამენტის თავმჯდომარემ, შალვა პაპუაშვილმა ოპოზიციის სურვილი, ზელენსკიმ პარლამენტს მიმართოს, ისტერიად შეაფასა, თუმცა ოპოზიციამ უკვე ოფიციალურად გააფორმა ეს ინიციატივა და მას შესაბამისი წერილით მიმართა.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

• პუტინის ომი უკრაინაში — განახლებადი

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში