სამოქალაქო საზოგადოების განცხადებით, ევროკავშირთან თანამშრომლობის გაღრმავება და წევრობა საქართველოსთვის დემოკრატიისა და ადამიანის უფლებების დაცვის წინაპირობა იქნება. მათივე თქმით, უკრაინაში მიმდინარე პროცესმა აჩვენა, რომ ევროპეიზაციის პროცესი უპირობოდ მნიშვნელოვანია.

ისინი, აღნიშნავენ, რომ საქართველოს ევროკავშირში გაწევრიანებას მხარს საქართველოს მოსახლეობის უდიდესი უმრავლესობა უჭერს და ხალხის ნება კონსტიტუციაშიცაა ასახული. განცხადებაში ხაზგასმულია, რომ სწორედ ამიტომ, ხელისუფლებამ 3 მარტს წევრობის სტატუსზე განაცხადი გააკეთა.

ისინი, ასევე, აცხადებენ, რომ მზად არიან, ევროკავშირში გაწევრიანების პროცესში აქტიურად ჩაერთონ. ამისთვის სამოქალაქო საზოგადოება ხელისუფლებას 10 გზას სთავაზობენ.

• შეიმუშაოს საქართველოს ევროპის კავშირში გაწევრების ეროვნული სტრატეგია და შექმნას მისი მონიტორინგის ქმედითი მექანიზმი, რომელშიც სამოქალაქო საზოგადოების ჩართულობა იქნება უზრუნველყოფილი;
• განახორციელოს 2021 წლის 19 აპრილს შეთანხმებით გათვალისწინებული დემოკრატიული რეფორმები;
• გააძლიეროს დიპლომატიური ძალისხმევა ევროკავშირის წევრ სახელმწიფოებთან საქართველო-ევროპის კავშირის ასოცირების ახალი დღის წესრიგის 2 დროულად მისაღებად და დაიწყოს მისი ეფექტიანი იმპლემენტაცია;
• გაწიოს სათანადო დიპლომატიური ძალისხმევა, ევროკომისიის მხრიდან ევროპის კავშირის კანდიდატის სტატუსის შეფასების კითხვარის მიღების დასაჩქარებლად;
• მობილიზება გაუკეთოს შესაბამის ადამიანურ, ფინანსურ და ტექნიკურ რესურსს (მათ შორის შექმნას შესაბამისი უწყებათშორისი სამუშაო ჯგუფი და/ან შესაბამისი უწყება), რათა მოხდეს კანდიდატის სტატუსის შეფასების კითხვარის დროული და სრულყოფილი შევსება და ევროპის კავშირისთვის წარდგენა;
• ახალი რეალობის გათვალისწინებით ცვლილებები შეიტანოს საქართველოს ევროკავშირში ინტეგრაციის კომისიის დებულებაში, გააქტიუროს და უფრო ეფექტიანი გახადოს მისი მუშაობა, რაც კითხვარზე პასუხების მომზადების პროცესში სამუშაო ჯგუფების აქტიურ ჩართვას ითვალისწინებს;
• გახადოს პროცესი გამჭვირვალე და ინკლუზიური. ჩამოაყალიბოს ევროპის კავშირში გაწევრიანების ეროვნული საბჭო, რომლის შემადგენლობაშიც შევლენ სფეროს ექსპერტები და ექნება საკონსულტაციო ორგანოს სტატუსი. საბჭო ხელს შეუწყობს საქართველოს ევროპის კავშირში გაწევრების პროცესის კოორდინაციასა და მონიტორინგს;
• განიხილოს საქართველოს პარლამენტის ევროპასთან ინტეგრაციის, ადამიანის უფლებების, იურიდიულ და საგარეო ურთიერთობების კომიტეტის თავმჯდომარეების, ასევე, ევროკავშირ-საქართველოს ასოცირების საპარლამენტო კომიტეტის პოსტების ოპოზიციის წარმომადგენლების მიერ დაკავების შესაძლებლობა, რათა გაიზარდოს საქართველოს ევროპის კავშირში გაწევრების პროცესზე საპარლამენტო ზედამხედველობა;
• პეტრას ციხის (ასოცირების ტრიო — მოლდოვა, საქართველო, უკრაინა) დეკლარაციის 5 შესაბამისად, ქმედითი ნაბიჯები გადადგას რათა ერთის მხრივ გაძლიერდეს ტრიოს თანამშრომლობის ფორმატი, დარეგულირდეს ურთიერთობები უკრაინასთან და მეორეს მხრივ, ჩამოყალიბდეს ტრიოსა და ევროპის კავშირის ერთობლივი სამიტი;
• უზრუნველყოს საქართველოს ევროპის კავშირში გაწევრების პროცესთან
  დაკავშირებული მოლოდინების მართვა და აწარმოოს შესაბამისი შიდა და საგარეო
  კომუნიკაცია.

განცხადებას ხელს 32 არასამთავრობო ორგანიზაცია აწერს ხელს, მათ შორისაა:

• ღია საზოგადოების ფონდი;
• საქართველოს რეფორმების ასოციაცია (GRASS);
• სამართლიანი არჩევნებისა და დემოკრატიის საერთაშორისო ასოციაცია (ISFED);
• საერთაშორისო გამჭვირვალობა საქართველო;
• მედიის განვითარების ფონდი (MDF);
• საქართველოს დემოკრატიული ინიციატივა (GDI);
• დემოკრატიის კვლევის ინსტიტუტი (DRI);
• ადამიანის უფლებათა ცენტრი (HRC);
• საფარი;
• სამოქალაქო მოძრაობა სირცხვილია;
• საქართველოს ახალგაზრდა იურისტა ასოციაცია (GYLA);
• სამოქალაქო იდეა;
• მწვანე ალტერნატივა და სხვა.