უკრაინის პრეზიდენტმა, ვოლოდიმირ ზელენსკიმ ბუნდესტაგში სიტყვით გამოსვლისას განაცხადა, რომ გერმანია აშენებს კედელს, რომელსაც ვერ ხედავს, კედელს თავისუფლებასა და არათავისუფლებას შორის და მოუწოდა კანცლერს, რომ დაანგრიოს ეს კედელი.

"მოგიმართავთ და შეგახსენებთ იმას, რაც საჭიროა, რის გარეშეც ევროპა ვერ გადარჩება, ვერ შეინარჩუნებს თავის ღირებულებებს. ყოფილმა მსახიობმა და ამერიკის შეერთებული შტატების პრეზიდენტმა, რონალდ რეიგანმა ერთხელ ბერლინში თქვა: "დაანგრიეთ ეს კედელი!".

ახლა მე მინდა გითხრათ: კანცლერო შოლც, დაანგრიეთ ეს კედელი! მიეცით გერმანიას ლიდერობა, რომელსაც იმსახურებთ და რითიც თქვენი შთამომავლები მხოლოდ იამაყებენ. მხარი დაგვიჭირეთ! მხარი დაუჭირეთ მშვიდობას! მხარი დაუჭირეთ თითოეულ უკრაინელს! შეაჩერეთ ომი! დაგვეხმარეთ ომის შეჩერებაში!" — ციტირებს უკრაინის პრეზიდენტს Unian.

ზელენსკიმ იკითხა, როგორ აღმოჩნდა, რომ უკრაინას უფრო ადრე დაეხმარენ ოკეანის მიღმა ქვეყნები, ვიდრე გერმანია და აღნიშნა, რომ ესეც კედლის შედეგია.

"რატომ აღმოჩნდა, რომ ოკეანის გაღმა ქვეყნები ჩვენთან უფრო ახლოს იყვნენ, ვიდრე თქვენ? იმიტომ, რომ ეს არის კედელი, რომელსაც ვიღაც ვერ ამჩნევს, მაგრამ რომელსაც ვეჯახებით ჩვენ მაშინ, როცა ვიბრძვით ჩვენი ხალხის გადასარჩენად", — ციტირებს ზელენსკის კორესპონდენტი.

უკრაინის პრეზიდენტის თქმით, ისტორიის გაკვეთილების სწავლა საკმარისი არ არის, ისინი პრაქტიკაში უნდა იქნას გამოყენებული.

"ჩვენი სიცოცხლისთვის, ჩვენი თავისუფლებისთვის ჩვენს ცხოვრებაში სამი ომის შემდეგ დავრწმუნდით იმაში, რასაც ადრე ვგრძნობდით და რასაც, ალბათ ჯერ ყველა ვერ ამჩნევთ — მაგრამ თითქოს ისევ კედლის მიღმა ხართ. დიახ, არა ბერლინის კედლის, არამედ ევროპის შუაგულში თავისუფლებასა და არათავისუფლებას შორის, და ეს კედელი ძლიერდება ყოველი ბომბით, რომელიც ეცემა ჩვენს მიწაზე, უკრაინაზე", — დასძინა ზელენსკიმ.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში