ცოტა ხნით ადრე, სანამ რუსეთი უკრაინაში შეიჭრებოდა, ქვეყანა კორონავირუსის პანდემიის გამო, მსოფლიოს ბევრი სახელმწიფოს მსგავსად, ფორსმაჟორულ სიტუაციასა და კარანტინში აღმოჩნდა. თუმცა, სხვა ქვეყნებისგან განსხვავებით, უკრაინაში ვაქცინაციის მაჩვენებელი ერთ-ერთი ყველაზე დაბალი იყო, რის გამოც უკრაინის წიგნის ინსტიტუტმა კამპანია წამოიწყო. კოვიდვაქცინის მიღების სანაცვლოდ მოქალაქეები 1000-ჰრივნიან (დაახლოებით, 112 ლარი) ვაუჩერს იღებდნენ, რომლითაც შეეძლოთ თეატრის და კინოს ბილეთი, სპორტული დარბაზის აბონემენტი ან წიგნები ეყიდათ. უკრაინელებმა არჩევანი უმეტესად ლიტერატურაზე შეაჩერეს და წიგნების საყიდლად 1 მილიარდზე მეტი ჰრივნა დახარჯეს.

ბევრ უკრაინელს წინათ არ სჩვეოდა წიგნების ყიდვა — კვლევები მიუთითებს, რომ რიგითი უკრაინელი წელიწადში მხოლოდ ერთ წიგნს კითხულობს. თუმცა, მას შემდეგ, რაც რუსეთმა ყირიმისა და აღმოსავლეთ რეგიონების ანექსირება მოახდინა, უკრაინის ხელისუფლებამ წიგნებთან დაკავშირებული რამდენიმე კანონი შემოიღო. ერთ-ერთი მათგანი რუსეთში დაბეჭდილი წიგნების იმპორტს კრძალავდა, სხვა კი, მედიას მასალის უკრაინულ ენაზე გამოქვეყნებას ავალდებულებდა. წამოწყებული პროგრამების მიზანი უკრაინელი ავტორების მხარდაჭერა და უცხოური ტექსტების უკრაინულად თარგმნის წახალისება იყო. ინიციატივამ შედეგიც გამოიღო — ასპარეზზე ბევრი ახალი ავტორი გამოჩნდა, უკრაინულმა გამომცემლობებმა კი მათი აქტიურად დაბეჭდვა დაიწყეს.

თანამედროვე უკრაინელმა მწერლებმა პუტინის რეჟიმის აგრესიაზე უკვე წიგნებიც შექმნეს, თუმცა, ქვეყანა ლიტერატურას რუსეთის თავდასხმის პირველივე დღეს დაემშვიდობა. ახლა არც წერისთვის სცალია ვინმეს და არც კითხვისთვის — ყველა მხოლოდ ახლობლების უსაფრთხოებაზე ფიქრობს. მას შემდეგ, რაც 24 თებერვალს რუსეთმა უკრაინის წინააღმდეგ სრულმასშტაბიანი ომი დაიწყო, თავდასხმის სამიზნედ არა მხოლოდ სამხედრო ინფრასტრუქტურა, არამედ მშვიდობიანი მოსახლეობაც იქცა. ქვეყნის არაერთ ქალაქში რუსულმა არმიამ მოქალაქეების საცხოვრებელი სახლების განადგურება დაიწყო, საპორტო დასახლება მარიუპოლში კი სამშობიარო და ბავშვთა საავადმყოფოც კი დაბომბეს, რასაც მსხვერპლი მოჰყვა.

• მარიუპოლი ომამდე და დღეს — სატელიტური ფოტოები ქალაქის დაბომბვის შედეგებს ასახავს

მართალია, ახლა უკრაინის მოქალაქეებს კითხვის დრო არ აქვთ, მაგრამ ბოლო თვეებში ნაყიდი წიგნები მათ მაინც გამოადგათ. მკვლევარმა ლევ შევჩენკომ თავის უბანში ფოტოც გადაიღო, როგორ ააგეს მისმა მეზობლებმა ბარიკადები წიგნებით. ინტერნეტში ვირუსულად გავრცელებულ სურათზე ჩანს, რომ ფანჯარა თავიდან ბოლომდე წიგნებით არის დაგმანული — მათი უმეტესობა ყუით შიგნითკენ დევს, ამიტომ სათაურების ამოკითხვა შეუძლებელია. თუმცა, ერთი მოზრდილი ტომის ავტორის დანახვა შევჩენკომ მაინც შეძლო — ეს რუსი მხატვრის, ილია გლაზუნოვის წიგნია. საინტერესო ისაა, რომ გლაზუნოვი, რომელმაც მეორე მსოფლიო ომი საკუთარი თვალით ნახა და საბჭოთა კავშირის დაშლასაც მოესწრო, პუტინის პოლიტიკის მხარდამჭერი იყო და რუსეთის "დიდებულებას" არაერთი ნახატიც მიუძღვნა. ახლა კი მისი ნამუშევრების ალბომით უკრაინელები სწორედ "დიდებული" რუსეთის არმიისგან იცავენ თავს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში