შვეიცარიაში დაფუძნებული კომპანია, რომელმაც Nord Stream 2 გაზსადენი ააშენა, გადახდისუუნაროდ გამოცხადებას გეგმავს. ამის შესახებ ექსკლუზიურ ინფორმაციას წყაროზე დაყრდნობით Reuters ავრცელებს.

Reuters-ის წყარო ამბობს, რომ შესაძლებელია კომპანიამ გადახდისუუნაროდ გამოცხადების შესახებ შვეიცარიის სასამართლოში პროცესი დაიწყოს.

რუსეთის მხრიდან უკრაინაში შეჭრის შემდეგ აშშ-მა Nord Stream 2-ს სანქციები დაუწესა. გავრცელდა ინფორმაცია იმის შესახებაც, რომ გერმანიამ მილსადენის სერტიფიცირების პროცესი შეაჩერა.

Nord Stream 2 AG შვეიცარიაშია რეგისტრირებული და რუსულ სახელმწიფო გიგანტ კომპანიას — გაზპრომს ეკუთვნის. კომპანიამ გასულ წელს დაასრულა 11 მილიარდიანი პროექტი, რომლის მიზანიც რუსეთიდან გერმანიაში გაზის ექსპორტი იყო.

როგორც უკვე აღინიშნა, 1 230 კმ სიგრძის მილსადენის ოპერირება არ დაწყებულა, რადგან გერმანიამ პროექტის სერტიფიცირების პროცესი გასულ კვირას შეაჩერა.

Reuters-ის ინფორმაციით, Nord Stream 2 AG თანამშრომლებთან კონტრაქებსაც წყვეტს. გაურკვეველია, როგორ აპირებს გაზპრომი მილსადენის მოვლას.

ორშაბათს, შვეიცარიის ეკონომიკის მინისტრმა, გაი პარმელინმა განაცხადა, რომ Nord Stream-ის 140-ზე მეტი თანამშრომელი, რომელიც შვეიცარიის ქალაქ ზაგში მუშაობდა, სამსახურიდან გაათავისუფლეს.

გერმანია, რომელიც გაზის ნახევარს რუსეთისგან იღებს, Nord Stream 2-ის პროექტს მხარს უჭერდა. განსხვავებით ევროკავშირისა და აშშ-სა, რომლებიც რეგიონის რუსეთზე დამოკიდებულების რისკებს ხედავდნენ.

გასულ კვირას რუსეთის მიერ უკრაინაში შეჭრის შემდეგ ბრიტანულმა ნავთობისა და გაზის კომპანია — Shell-მა განაცხადა, რომ Nord Stream 2-ის პროექტში ჩართული აღარ იქნება.

გაიგეთ მეტი: