ვიდეო თამაშები უკვე დიდი ხანია, რაც ჩვეულებრივი გასართობი აღარ არის და ბევრი გეიმერი წლებია პროფესიონალურ ტურნირებშიც გამოდის, წარმატებას აღწევს და სოლიდურ საპრიზო თანხასაც ეუფლება.

E-sports სპორტულ სახეობად უკვე აზიის ოლიმპიურმა საბჭომაც აღიარა და ამ ორგანიზაციის გადაწყვეტილებით, 2022 წლის აზიის თამაშებზე პროფესიონალ გეიმერებს მედლებისთვის ბრძოლა შეეძლებათ.

ჯერ-ჯერობით უცნობია იმ თამაშების სია, რომლებშიც მედლები გათამაშდება. თუმცა ამბობენ, რომ გეიმერები ერთმანეთს FIFA-ში, MOBA (Multiplayer Online Battle Arena) და RTA (Real Time Attack) ტიპის თამაშებში შეეჯიბრებიან.

აზიის თამაშები გეიმერებს ისეთივე საპრიზო ფონდს ვერ სთავაზობს, როგორც e-sports ტურნირები, მაგრამ ეს აღიარება ელექტრონული სპორტისთვის მნიშვნელოვანი ნაბიჯია. აზიის თამაშები, ოლიმპიადის შემდეგ, მსოფლიოში ყველაზე დიდი სპორტული მოვლენაა.