მოძრაობა აუდიტორია 115-ის წევრი, ლევან ლორთქიფანიძე საზოგადოებრივი მაუწყებლის შენობაში შეჭრის საქმეზე პოლიციაში დაიბარეს. ამის შესახებ ლორთქიფანიძე საკუთარ ფეისბუკ გვერდზე წერს.

"ია ანთაძის წყევლის გამო, დღეს სამ საათზე უკვე მე მელოდებიან პოლიციაში. ვამაყობ, რომ მონაწილეობა მივიღე 1 000 ადამიანისთვის სამსახურის შენარჩუნების საქმეში. საზმაუს ფოიეში საშვის გარეშე შესვლა დანაშაულად არ მიმაჩნია," - წერს ლორთქიფანიძე.

დაკითხვაზე იმყოფებოდა აუდიტორია 115-ის კიდევ ერთი წევრი, ირაკლი კუპრაძე გუშინ, 12 აპრილს. მანამდე კი განყოფილებაში გიორგი სოფრომაძეც დაიბარეს.

9 თებერვალს, აუდიტორია 115-მა საზოგადოებრივი მაუწყებლის შენობასთან აქცია გამართა და მაუწყებლის თანამშრომლებს სოლიდარობა გამოუცხადა. მოძრაობის წევრები შენობაში წინასწარი ნებართვის გარეშე შევიდნენდა ხუთწუთიანი პირდაპირი ეთერი მოითხოვეს.