საქართველოში ევროკავშირის ელჩის, კარლ ჰარცელის განცხადებით, ევროკავშირი სრულიად აღიარებს საქართველოს სუვერენიტეტს, ტერიტორიულ მთლიანობას და უფლებას, თავად აირჩიოს ვისთან სურს თანამშრომლობა. მისი თქმით, ევროკავშირი მზადაა, დესტაბილიზაციის მიმართულებით შესაბამისი ზომები მიიღოს.

"როგორც ევროკავშირის წარმომადგენელს, შემიძლია ვთქვა, რომ ჩვენ, ევროკავშირი, სრულიად ვაღიარებთ საქართველოს სუვერენიტეტსა და ტერიტორიულ მთლიანობას, ასევე, ქვეყნის უფლებას, აირჩიოს ის თანამშრომლობა და ის ორგანიზაციები, ვისთანაც უნდა ითანამშრომლოს საკუთარი გადაწყვეტილების მიხედვით, რაც არის ქვეყნის ფუნდამენტური უფლება. ჩვენ პარტნიორებთან ერთად ამ პროცესს ვაკვირდებით, ხელს ვუწყობთ და ვხედავთ, რომ სიტუაცია რთულია. ევროკავშირი მზადაა, მიიღოს ზომები იმისთვის, რომ დესტაბილიზაციის მიმართულებით დიდი ფასი გადაიხადოს", — აცხადებს ის.

11 იანვარს საქართველოში ამერიკის შეერთებული შტატების ელჩმა, კელი დეგნანმა განაცხადა, რომ აშშ პატივს სცემს თითოეული ქვეყნის, მათ შორის, საქართველოსა და უკრაინის, სუვერენიტეტს. ამასთანავე, დეგნანმა ხაზი გაუსვა, რომ აშშ საქართველოს გარეშე მის შესახებ მოლაპარაკებებს არ აწარმოებს და კიდევ ერთხელ განმარტა, რომ მისი მხარდაჭერა საქართველოს ტერიტორიული მთლიანობისა და სუვერენიტეტის მიმართ ურყევია.

10 იანვარს აშშ-ის სახელმწიფო მდივნის მოადგილე, ვენდი შერმანი ჟენევაში რუსეთის საგარეო საქმეთა მინისტრის მოადგილეს, სერგეი რიაბკოვს შეხვდა. თითქმის 8-საათიანი შეხვედრის შემდეგ მათ ჟურნალისტებთან ისაუბრეს. ორივე მხარე თანახმაა მოლაპარაკებების გაგრძელებაზე, თუმცა კომენტარებით ცხადია, რომ ისინი შორს არიან შეთანხმების მიღწევისგან.

შერმანის თქმით, შეხვედრაზე გულწრფელად და პირდაპირ ისაუბრეს და ეს იყო დისკუსია ერთმანეთის უკეთ გასაგებად. მისივე თქმით, ეს არ იყო ის, რასაც მოლაპარაკებებს ეძახიან. თავის მხრივ რიაბკოვიც ამბობს, რომ შეხვედრა რთული, პროფესიონალური და კონკრეტული იყო. მისივე თქმით, აშშ სერიოზულად მიუდგა რუსეთის მოთხოვნებს.

რიაბკოვმა თქვა, რომ რუსეთს უკრაინზე თავდასხმის გეგმა არ აქვს და აღნიშნა, რომ დასავლეთს შანტაჟისა და სანქციების გარდა არსენალში არაფერი დარჩა. შერმანმა კი განაცხადა, რომ მათთვის მიუღებელია რუსეთის მოთხოვნები ნატოს გაფართოების შეჩერებაზე და არ მიიღებენ გადაწყვეტილებას უკრაინაზე უკრაინის გარეშე, ისევე, როგორც ნატოზე, ნატოს გარეშე. რიაბკოვის განცხადებით, მოსკოვს სჭირდება "რკინა-ბეტონის გარანტიები", რომ საქართველო და უკრაინა არასდროს გახდებიან ნატოს წევრები, რაც იმაზე მიუთითებს, რომ რუსეთი პოზიციებს არ თმობს.

ამავე თემაზე: