ქართული ოცნების თავმჯდომარე, ირაკლი კობახიძე ამერიკის შეერთებული შტატების საელჩოს განცხადებასთან დაკავშირებით ამბობს, რომ ასეთი განცხადებები ქართული საზოგადოების ნდობას არყევს დასავლელი პარტნიორების მიმართ.

"ჩვენ ჩვენს პარტნიორებთან გვაქვს 30-წლიანი ძალიან წარმატებული თანამშრომლობის გამოცდილება, ძალიან ხშირად ჩვენ ვიღებთ ხოლმე მათგან რჩევებს და რა თქმა უნდა, ვითვალისწინებთ ამ რჩევებს. არის ხოლმე, სამწუხაროდ, ასეთი გამონაკლისი შემთხვევები, როდესაც ჩვენ ვისმენთ არასამართლიან და არასწორ შეფასებებს მათი მხრიდან და ეს არის ამის მორიგი მაგალითი. სამწუხაროდ, ასეთი განცხადებები არყევს ქართული საზოგადოების ნდობას დასავლელი პარტნიორების მიმართ, რაც არ არის კარგი. ეს ჩვენ არ უნდა დავუშვათ.

რა თქმა უნდა, ჩვენ ვიცით, რომ არის ხოლმე ადამიანური შეცდომები, არასწორი ინფორმაციები და ა.შ. თუმცა რა თქმა უნდა, საზოგადოებისთვის ეს არ არის არც ახსნა და არც მით უმეტეს, გამართლება, შესაბამისად ჩვენთვის მნიშვნელოვანია, ბუნებრივია, რომ საზოგადოების სათანადო ინფორმირება მოვახდინოთ", — განაცხადა კობახიძემ.

შინაარსთან დაკავშირებით ის ამბობს, რომ განცხადებაში არაერთი უზუსტობაა და მთლიანობაში არასამართლიანია.

"რაც შეეხება უშუალოდ განცხადების შინაარსს, აქ არის არაერთი უზუსტობა, ანუ მთლიანობაში არის არასამართლიანი განცხადება, არის უზუსტობები, მათ შორის ფაქტობრივი უზუსტობები, ტექნიკური შეცდომები ამ განცხადებაში, რაც არის ძალიან სამწუხარო და რა თქმა უნდა, ეს ყველაფერი უნდა უკავშირდებოდეს, ბუნებრივია, ადამიანურ შეცდომებს, მათ შორის ის, რომ საუბარია სამსახურის გაუქმებაზე, რაც არის არასწორი", — თქვა მან.

3 იანვარს აშშ-ის საელჩომ საქართველოს ხელისუფლება ინსპექტორის სამსახურისა და საერთო სასამართლოების შესახებ კანონპროექტებში შეტანილი ცვლილებების გამო გააკრიტიკა. საელჩოს განცხადებით, გასულ კვირას ინსპექტორის სამსახურის გაუქმებით ქართულმა ოცნებამ მთავრობის ანგარიშვალდებულებას ძირი გამოუთხარა, ხოლო სასამართლოებზე მიღებული კანონპროექტით კიდევ უფრო შეასუსტა ნდობა სასამართლოს მიმართ.

პარლამენტმა სახელმწიფო ინსპექტორის სამსახურის გაუქმებისა და სასამართლოების შესახებ კანონპროექტები მესამე მოსმენით დაჩქარებული წესით 30 დეკემბერს დაამტკიცა.