ევროკავშირის ელჩი საქართველოში კარლ ჰარცელი იმედის კვირასთან ინტერვიუში ქვეყანაში წლის განმავლობაში მიმდინარე მოვლენებს, მათ შორის 5 ივლისს, აფასებს. ჰარცელის თქმით, ის ძალადობა, რომელიც იმ დღეს მოხდა, მისთვის მოულოდნელიც იყო და გულსატკენიც.

"უნდა ვთქვა, რომ 5 ივლისს ნამდვილად ვერ ვიცანი ის საქართველო, რომელსაც ბოლო სამი წლის განმავლობაში ვიცნობდი. ქვეყანა, რომელიც ცნობილია თავისი ტოლერანტობითა და მრავალფეროვნებით. ის მოვლენები, ის ძალადობა, რომელიც იმ დღეს მოხდა, ჩემთვის მოულოდნელიც იყო და გულსატკენიც", — თქვა ელჩმა იმედთან.

ჰარცელისგანცხადებით, ხელისუფლების პასუხისმგებლობაა უმცირესობებისა და მათი სიტყვის თავისუფლების მხარდაჭერა და დაცვა.

"ასევე, ხელისუფლების პასუხისმგებლობაა იმის უზრუნველყოფა, რომ ჟურნალისტებმა შეძლონ თავიანთი საქმიანობის განხორციელება და უსაფრთხო გარემოში მუშაობა. ის, რაც მოვლენებს უნდა მოყვეს არის შემდგომი სათანადო ზომების მიღება ამ ძალადობის წამქეზებელთა და ორგანიზატორთა გამოსვლენად. ისინი სასამართლოს წინაშე უნდა წარსდგნენ", — აღნიშნა მან.

5-6 ივლისს ჰომოფობიურ და ძალადობრივი ჯგუფების თავდასხმის შედეგად მედიის 53 წარმომადგენელი დაშავდა. ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, აქციაზე ნაცემი TV პირველის ოპერატორი, ლექსო ლაშქარავა გარდაიცვალა.

5-6 ივლისის ძალადობას წინ უძღოდა ქართული ოცნების ლიდერების განცხადებები იმაზე, რომ ღირსების მარშს მიზანშეწონილად არ მიიჩნევენ. 5 ივლისს, როცა უკვე დაწყებული იყო ძალადობა, ღარიბაშვილმა ისევ თბილისი პრაიდი გააკრიტიკა, რამდენიმე დღეში კი გაიმეორა ჰომოფობიური ჯგუფების გზავნილი პროპაგანდის შესახებ.

ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.