გარემოსდაცვითი ზედამხედველობის დეპარტამენტის მტკიცებით, გამოვლინდა ბზის უკანონო მოპოვებისა და ტრანსპორტირების ფაქტი. შემთხვევა სამეგრელო-ზემო სვანეთში მოხდა:

"მარტვილის მუნიციპალიტეტში, ლებარდეს მიმდებარე ტერიტორიაზე, დეპარტამენტის თანამშრომლებმა ბზის ტოტებით დატვირთული მიკროავტობუსი შეაჩერეს, რომელსაც მოქალაქე ჯიმშერ შულაია მართავდა."

საქართველოს ადმინისტრაციული კოდექსით აკრძალულია ბზის ჭრა, ამოძირკვა ან/და ტოტების დაზიანება. ამ შემთხვევაში დგება ადმინისტრაციული პასუხისმგებლობა, რომელიც ითვალისწინებს ჯარიმას 150-დან 500 ლარამდე.

იმ შემთხვევაში, თუ გარემოსთვის მიყენებული ზიანი აჭარბებს 1000 ლარს, აღიძვრება სისხლის სამართლის საქმე. დეპარტამენტის ცნობით, კი აღნიშნულ შემთხვევაში, ჯიმშერ შულაიას მიერ გარემოსადმი მიყენებული ზიანის ოდენობა 49 124 ლარია:

"ფაქტი შეიცავს სისხლის სამართლის კოდექსით გათვალისწინებული დანაშაულის ნიშნებს. მასალები, შემდგომი რეაგირებისათვის, შესაბამის საგამოძიებო ორგანოს გადაეგზავნა," - აღნიშნავს უწყება.