ევროპაში ვაქცინაციის კამპანიამ უკვე მოიცვა სხვადასხვა სახის წახალისება თუ შეზღუდვა, თუმცა, გერმანიაში მოქალაქეების კორონავირუსის საწინააღმდეგო ვაქცინით აცრისათვის უჩვეულო გზას მიმართეს. ქვეყნის ევთანაზიის ასოციაციის, Verein Sterbehilfe-ის განცხადებით, ამიერიდან ისინი მხოლოდ მათ დაეხმარებიან, ვინც ვაქცინირებული ან დაავადებისგან გამოჯანმრთელებულია. გადაწყვეტილების საფუძველი თანამშრომლებისა და ექიმების უსაფრთხოების უზრუნველყოფაა.

"ევთანაზია და ჩვენი წევრების უფლება და ნებაყოფლობითი გადაწყვეტილება, დაასრულონ საკუთარი სიცოცხლე, ადამიანების სიახლოვეს მოითხოვს", — წერია ასოციაციის გავრცელებულ განცხადებაში, — "ადამიანების სიახლოვე კი, კორონავირუსის გავრცელებისთვის ხელსაყრელ გარემოს ქმნის. დღეისათვის, 2G-ის წესი ჩვენს ასოციაციაში უკვე მოქმედებს".

2G-ის წესი გერმანიაში geimpft oder genese-ს მოიაზრებს ("აცრილი ან გამოჯანმრთელებული"), რაც მხოლოდ აღნიშნული ორი წინაპირობიდან ერთ-ერთის დაკმაყოფილების შემთხვევაში მომსახურების დაშვებას გულისხმობს.

ფოტო: perspectives.esmo.org

ვაქცინაცია ამ დრომდე რჩება კორონავირუსის წინააღმდეგ ყველაზე ეფექტურ საშუალებად. საქართველოში ამ დროისთვის 3 სხვადასხვა ვაქცინაა ხელმისაწვდომი. უკვე შესაძლებელია ბუსტერითა და ჩანაცვლებით სარგებლობაც. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

აღსანიშნავია, რომ საქართველოში 1-ლი დეკემბრიდან ე.წ. მწვანე პასპორტები ამოქმედდება. ის იმოქმედებს 18 წლის ასაკის ზემოთ მოქალაქეებისა და ტურისტებისთვის. ისინი სხვადასხვა ობიექტზე მხოლოდ ამ საშვებით შევლენ, თუმცა ეს გავრცელდება დაწესებულებების სტუმრებზე და არა იქ მომუშავე პერსონალზე.