ჯანდაცვის კომიტეტის თვამჯდომარე, დიმიტრი ხუნდაძე აცხადებს, მიხეილ სააკაშვილის ჯანმრთელობის მდგომარეობაზე პასუხისმგებელი თავად ექსპრეზიდენტია. ეს განცხადება ხუნდაძემ მას შემდეგ გააკეთა, რაც სააკაშვილმა საკუთარი ადვოკატების თვალწინ გონება დაკარდა.

"პასუხისმგებლობა ეკისრება ყველას, ვინც ამ პროცესს უწყობს ხელს და პასუხისმგებლობა, რა თქმა უნდა, ეკისრება თვითონ მიხეილ სააკაშვილსაც, როემლიც ქმნის აურზაურს და მთელი ქვეყანა დაძაბა მისი ამ გადაწყვეტილების, აბსოლუტურად უსაფუძველო გადაწყვეტილების გამო", — განაცხადა ჯანდაცვის კომიტეტის თავმჯდომარემ.

დაახლოებით ერთი საათის წინ ექსპრეზიდენტის ადვოკატმა, ბექა ბასილაიამ განაცხადა რომ, მათთან შეხვედრის შემდეგ, ოთახიდან გასვლისას სააკაშვილი "მოსხლეტით წაიქცა" და გონება დაკარგა. დაახლოებით ნახევარი საათის შემდეგ პენიტენციურმა სამსახურმა გაავრცელა განცხადება, სადაც ნათქვამია, რომ ექსპრეზიდენტის მდგომაროება სტაბილურია.

მიხეილ სააკაშვილი 49-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

გაიგე მეტი: