ჯანდაცვის მინისტრის მოადგილის, თამარ გაბუნიას განცხადებით, "ფინანსურმა წახალისებამ" 60 წელს ზევით პირებში ვაქცინაციის გაფართოებას სტიმული მისცა. საუბარია საკოორდინაციო საბჭოს გადაწყვეტილებაზე, რომლის მიხედვითაც, 8 ნოემბრიდან თითოეული პენსიონერი, რომელიც ვაქცინაციას პირველ იანვრამდე ჩაიტარებს, ერთჯერად 200-ლარიან საპენსიო დანამატს მიიღებს.

"აცრილთა შორის სტრუქტურულად 28%-დან 44%-მდე გაიზარდა 60 წლის ზემოთ ასაკობრივ ჯგუფში პირთა რიცხვი. საერთოდ, ვაქცინაციის გუშინდელი მაჩვენებელი 8 000-ს აჭარბებს, რაც იმედმომცემია და ვფიქრობთ, რომ კიდევ უფრო მეტი მატება არის მოსალოდნელი", — განაცხადა მან.

მანვე აღნიშნა, რომ არის ინტერესი ბუსტერ დოზების მიმართ, განსაკუთრებით კი მაღალი 18-დან 49 წლის ასაკობრივ კატეგორიაში. რაც შეეხება 12-დან 15 წლის ასაკის ბავშვების ვაქცინაციას, მისი თქმით, ამ დრომდე 643 დოზის ადმინსიტრირება მოხდა. ხოლო 16-დან 18 წლამდე 11 000-ზე მეტი მოზარდია აცრილი.