თბილისის საპატრულო პოლიციის უფროსის, ვაჟა სირაძის განცხადებით, ოპოზიციის წევრებს წინასწარ არ განუცხადებიათ აქციის მარშრუტის შესახებ და არავის მისცემენ საშუალებას, მოახდინოს ქალაქის პარალიზება და კოლაფსი. კითხვაზე, რატომ არის მობილიზებული წყლის ჭავლის მანქანა და სპეცრაზმი ის აცხადებს, რომ სამართალდარღვევის შემთხვევაში, პოლიცია მიიღებს შესაბამის ზომებს.

"შინაგან საქმეთა სამინისტრომ გაავრცელა განცხადება ამ ყველაფრის თაობაზე და ყველას განუმარტა შეკრებისა და მანიფესტაციის შესახებ კანონის თაობაზე, ასევე იმის, თუ რა არის სამართალდარღვევა და რა არა. სწორედ ამითვის არის აქ პოლიცია და მიიღებს კანონით გათვალისწინებულ, შესაბამის, მყისიერ ზომებს სამართალდარღვევის შემთხვევაში", — განუცხადა მან ჟურნალისტებს.

დღეს შინაგან საქმეთა სამინისტრომ ოპოზიციის მიერ დაანონსებულ, თბილისის ორივე სანაპიროზე გზების გადაკეტვაზე განაცხადა, რომ კანონის თანახმად, ტრანსპორტის სავალი ნაწილის გადაკეტვა დაუშვებელია და ამ წესის დარღვევა გამოიწვევს პასუხისმგებლობას ადმინისტრაციულ სამართალდარღვევათა კოდექსის შესაბამისად. შსს-ს თანახმად, საჭიროების შემთხვევაში, საზოგადოებრივი წესრიგის აღდგენის მიზნით, კანონით გათვალისწინებულ პროპორციულ ძალასა და სპეციალურ საშუალებებს გამოიყენებდნენ.

ნაციონალური მოძრაობის შეფასებით, უწყების ეს განცხადება მიმართულია დაგეგმილი აქციის ხელშესაშლელად და წარმოადგენს მშვიდობიანი დემონსტრანტების დაკავებების დაანონსებას. პარტიის თქმით, ყველა შესაბამისი უწყება 14 ნოემბერს საჯაროდ გააფრთხილეს, რომ მომდევნო დღეს მშვიდობიანი მსვლელობა იქნებოდა. მათივვე განმარტებით, ამის მიზანი იყო ის, რომ მოქალაქეთა უფლებების დასაცავად უწყებებს შესაბამისი ზომები მიეღოთ.