სახელმწიფო ინსპექტორის სამსახურის გამომძიებელი, გიორგი მიქელაძე აცხადებს, რომ ექსპრეზიდენტ მიხეილ სააკაშვილს ექსპერტიზა დღეს ჩაუტარდება.

"შეთანხმებული ვართ პენიტენციურ დაწესებულებასთან და ასევე, მიხეილ სააკაშვილის ადვოკატებთან, რომ მათთვის მისაღები ფორმით განხორციელდება მიხეილ სააკაშვილის გამოკითხვა და შემოთავაზებულია ისეთი ფორმა, რაზეც ისინი თანხმობას აცხადებენ. ეს იქნება უშუალო კომუნიკაცია, ისეთი ფორმით გამოკითხვა, რაც არ შექმნის იმ დისკომფორტს, რაც გუშინ იყო გამოწვეული, ასევე,

ამ პროცესს დაესწრება მიხეილ სააკაშვილის ადვოკატი და გამომძიებელი ჩაატარებს გამოკითხვას. ასევე, მინდა მოგახსენოთ, რომ დანიშნულია ექსპერტიზა, რომელიც უნდა ჩატარდეს დღეს და მასში მონაწილეობას მიიღებს მიხეილ სააკაშვილის მოწვეული სპეციალისტი, მის პირად ექიმზე, ნიკოლოზ ყიფშიძეზე გვაქვს საუბარი", — განაცხადა მან.

9 ნოემბერს სახელმწიფო ინსპექტორის სამსახურმა სახალხო დამცველის მიმართვის, ასევე, მედიით გავრცელებული ინფორმაციის შემდეგ, მიხეილ სააკაშვილის მიმართ შესაძლო არაადამიანური მოპყრობის საქმეზე გამოძიება დაიწყო.

მიქელაძის განცხადებით, ექსპრეზიდენტმა, მიხეილ სააკაშვილმა მის მიერ მოწოდებული ექსპერტების მონაწილეობით სამედიცინო ექპერტიზის ჩატარებაზე თანხმობა განაცხადა. ამის შესახებ მან 9 ნოემბერს გლდანის ციხის სამკურნალო დაწესებულებიდან გამოსვლის შემდეგ ისაუბრა.