უკრაინის სახალხო დამცველის, ლუდმილა დენისოვას განცხადებით, უკრაინაში საქართველოს ელჩმა, გიორგი ზაქარაშვილმა მასთან შეხვედრა გააუქმა. როგორც დენისოვა განმარტავს, გაუქმების მიზეზი მიხეილ სააკაშვილის შესახებ უკრაინის საგარეო საქმეთა სამინისტროს განცხადება გახდა.

"უარი თქვა ჩემთან შეხვედრის შეთავაზებაზე მიხეილ სააკაშვილთან დაკავშირებით "უკრაინის საგარეო საქმეთა სამინისტროს განცხადების პოლიტიკური კონტექსტისა და საქართველოს საგარეო საქმეთა სამინისტროსთან შემდგომი კონსულტაციების საჭიროების გათვალისწინებით". შეხვედრაზე მსურდა ახსნა-განმარტებების მიღება", — წერს დენისოვა.

უკრაინის სახალხო დამცველის შეფასებით, სააკაშვილის უფლებები და თავისუფლებები უხეშად ირღვევა და გლდანის ციხის კლინიკაში მისმა გადაყვანამ, კიდევ უფრო გაამწვავა ვითარება, "რომელიც დღეს მის სიცოცხლესა და ჯანმრთელობას ემუქრება".

"ველოდები უკრაინაში საქართველოს რესპუბლიკის საგანგებო და სრულუფლებიანი ელჩისგან, როგორც საქართველოს რესპუბლიკის ოფიციალური წარმომადგენლისგან, ახსნა-განმარტებებს საქართველოს ხელისუფლების მიერ უკრაინის მოქალაქის მიხეილ სააკაშვილის წამების, არასათანადო მოპყრობის და ფუნდამენტური უფლებებისა და თავისუფლებების დარღვევის ფაქტებთან დაკავშირებით", — წერს ის.

დენისოვა აცხადებს, რომ დარღვეულია ადამიანის უფლებათა კონვენციის არაერთი მუხლი და მოუწოდებს საერთაშორისო თანამეგობრობას, ჰქონდეთ დაუყოვნებლივი რეაგირება.

"კატეგორიულად ვგმობ უკრაინის მოქალაქის მიხეილ სააკაშვილის უფლებებისა და თავისუფლებების სისტემატურ და უხეში დარღვევას ქართველი ოფიციალური პირების მიერ და მოვუწოდებ უცხო სახელმწიფოებს და საერთაშორისო უფლებადამცველ ორგანიზაციებს, დაუყოვნებლივ ჰქონდეთ რეაგირება საქართველოს ხელისუფლების მსგავს ქმედებებზე და მოითხოვონ მისი უფლებების აღდგენა", — წერს ის.

გუშინ, 8 ნოემბერს, მას შემდეგ რაც ექსპრეზიდენტი მიხეილ სააკაშვილი გლდანის ციხის კლინიკაში გადაიყვანეს, სადაც მკურნალობა მას კატეგორიულად არ სურდა, უკრაინის საგარეო საქმეთა სამინისტრომ განცხადება გაავრცელა. უწყებაში აღნიშნავდნენ, რომ იმედგაცრუებულები არიან და ქართულ მხარეს მოუწოდებენ, სააკაშვილი დაუყოვნებლივ გადაიყვანოს სამოქალაქო სამედიცინო დაწესებულებაში, რომელსაც ყველა სათანადო სამედიცინო დახმარებისა და გადაუდებელი დახმარების უზრუნველსაყოფად საჭირო პირობა ექნება.

უკრაინის საგარეო უწყების განცხადებითვე, სამინისტრო და უკრაინის საელჩო საქართველოში მიხეილ სააკაშვილის ირგვლივ შექმნილი ვითარების სპეციალურ კონტროლს აგრძელებენ.

8 ნოემბერს ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

ექსპრეზიდენტის ციხეში შეყვანის შემდეგ ადგილზე სპეცრაზმი, წყლის ჭავლის მანქანა და დამატებითი საპოლიციო ძალები შეიყვანეს. გარდა ამისა, ციხეში მიიტანეს კომპიუტერული ტომოგრაფიის აპარატი. მანამდე რამდენიმე დღით ადრე კი უწყება ამტკიცებდა, რომ ციხის კლინიკა საჭირო ტექნიკით აღჭურვილია.

მოთხოვნის მიუხედავად, სააკაშვილთან ღამით არ უშვებდნენ არც ადვოკატებს და არც პირად ექიმს. ადვოკატების თქმით, არასამუშაო საათების მიუხედავად, ვითარება ორდინალური არ იყო და უნდა შეეშვათ.

ნინო ლომჯარიას განცხადებით კი, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

გარდა ამისა, ციხიდან გამოსვლის შემდეგ ომბუდსმენმა თქვა, რომ მე-18 პენიტენციურ დაწესებულებაში ჯერ კიდევ დერეფანში დგას კომპიუტერული ტომოგრაფი, რომელიც იქ მას შემდეგ მიიტანეს, რაც კლინიკაში მიხეილ სააკაშვილი გადაიყვანეს. მისივე თქმით, კლინიკაში არ არის მაგნიტურ რეზონანსული ტომოგრაფიისა (MRT) და კათეტერიზაციის აპარატი.

ფიზიკურ ძალადობაზე საუბრის გარდა, სააკაშვილი წერილში ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში".

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.