დროას ლიდერი ელენე ხოშტარია აცხადებს, რომ საღამოს თავს უკეთ გრძნობს. ის კატეგორიულ უარზეა მიიღოს რაიმე სახის ვიტამინი ან გადასხმა.

ხოშტარია განმარტავს, რომ შიმშილობის სხვადასხვა ფორმა არსებობს, მათ შორის ისეთი, რომელიც საკვებით დანამატებითა და ვიტამინებით შიმშილობის გახანგრძლივებას და სასიცოცხლო მაჩვენებლების შენარჩუნებას გულისხმობს, მაგრამ თავად მხოლოდ წყალს, უშაქრო ყავასა და ჩაის იღებს. მისი თქმით, ამ ფორმას ირჩევს, რადგან სააკაშვილის მდგომარეობა მძიმდება და არ აქვს იმის დრო, რომ დანამატებით შიმშილობა გაახანგრძლივოს.

"რომ იყოს პოლიტიკური ამოცანა თვეებზე გაწერილი, მეც მივიღებდი დანამატებს, მაგრამ რადგან მიხეილ სააკაშვილის მდგომარეობა არის კრიტიკული, მე კატეგორიულად ვაცხადებ, არ მივიღებ არც ბორჯომს, არც არანაირ მინერალებს, არანაირ გადასხმას, გლუკოზებს და ასე შემდეგ. უნდა იცოდეს ქართულმა ოცნებამ რომ გამოსავალი არის მარტივი, მიხეილ სააკაშვილის კლინიკაში გადაყვანა და მისი სიცოცხლის უფლების უზრუნველყოფა", — განაცხადა მან.

ამავდროულად, ის აღნიშნავს, რომ დათმობაზე არ წავა და ეს არ არის ემოციური განცხადება.

"ერთი რამ უნდა იცოდნენ ძალიან მყარად, რომ არ არსებობს არცერთი პროცენტი იმისა, რომ მე რაიმე დათმობაზე წავიდე და რაიმე ან ძალით, ან რამენაირად რამე მივიღო", — განაცხადა მან.

ის გამოეხმაურა პენიტენციური სამსახურის მიერ გავრცელებულ მიხეილ სააკაშვილის კადრებსაც და აღნიშნა, რომ შემაძრწუნებელი და უბინძურესი პროპაგანდაა.

"პროცედურით მას აძლევენ მინერალებს, რომლებიც არის ყველა საერთაშორისო პროტოკოლით დადგენილი, რომლეიბც არის სიცოცხლის შენარჩუნებისთვის და გამოიყენება შიმშილობის გარკვეულ ფორმებში. ჩემი ამოცანა რომ იყოს ერთი თვე მქონდეს დრო და სააკაშვილს ერთი თვე აქვს დრო, მეც მივიღებდი ამ მინერალებს, იმიტომ, რომ ეს არის შიმშილობის ჩვეულებრივი ფორმა", — განაცხადა მან.

ელენე ხოშტარია, მეხუთე დღეა შიმშილობს. მისი მთავარი მოთხოვნაა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანონ. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

დღეს, 7 ნოემბერს პარლამენტში სასწრაფო გამოიძახეს. ხოშტარია აცხადებს, რომ სასწრაფო დახმარება პარლამენტმა გამოიძახა და მას არ უთხოვია. მისი თქმით, სუსტად არის, მაგრამ დრამატული არაფერი ხდება.

სასწრაფოს ექიმის განცხადებით, ხოშტარიამ გადასხმაზე უარი თქვა. მისივე თქმით, სასიცოცხლო პარამეტრები ოდნავ შეიცვალა, მაგრამ ნორმის ფარგლებში რჩება.

ამავე თემაზე: