სპეციალური პენიტენციური სამსახურის ხელმძღვანელი, ნიკა ცხვარაშვილი აცხადებს, რომ ექსპრეზიდენტი, მიხეილ სააკაშვილი საკვებ დანამატებს უკვე გარკვეული პერიოდია იღებს.

"გიდასტურებთ, რომ პატიმარმა მიხეილ სააკაშვილმა, გარკვეული პერიოდია დაიწყო საკვები დანამატების მიღება, მათ შორის, თხევადი და არათხევადი სახით. ასევე, კონკრეტული დანიშნულების ნატურალური წვენები და ეს პერიოდი მან განვლო ზუსტად ამ დანამატების მიღების ხარჯზე", — აღნიშნა მან.

რაც შეეხება, საკვების მიღებასთან დაკავშირებით კადრების გასაჯაროების საკითხს, მისი თქმით, ამ ეტაპზე ამაზე პასუხი არ აქვს, რადგან აღნიშნულზე მსჯელობა მიმდინარეობს.

"რაც შეეხება კადრების გასაჯაროვებას, ამაზე ცალსახად პასუხს, ჯერჯერობით, ვერ გაგცემთ. ვიდეო მეთვალყურეობა მიმდინარეობს, ისევ და ისევ, მისი ჯანმრთელობისა და უსაფრთხოებიდან გამომდინარე. რამდენად მიზანშეწონილია ეს ყველაფერი ამ შექმნილი ვითარებიდან, ამ ყველაფერზე მიმდინარეობს მსჯელობა", — განაცხადა მან.

ამასთან, როგორც სპეციალური პენიტენციური სამსახურის სამედიცინო დეპარტამენტის უფროსის მოადგილემ, გიორგი ჩიდრაშვილმა განაცხადა, ექსპრეზიდენტის ჯანმრთელობის მდგომარეობა სტაბილურია და ამ ეტაპზე სტაციონარიზაციის აუცილებლობა არ დგას.

გუშინ, 5 ნოემბერს რატი ბრეგაძემ განაცხადა, რომ მიხეილ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა. მისივე მტკიცებით, მესამე პრეზიდენტი იღებს ექიმების მიერ გამოწერილ მედიკამენტებსაც. იუსტიციის მინისტრის თქმით, ინფორმაციას მხოლოდ იმიტომ ასაჯაროვებდა, რომ აღნიშნულზე უკვე უპასუხეს ერთ-ერთი დეპუტატის კითხვას და "ეს ინფორმაცია ისეც საჯარო გახდება". აღსანიშნავია, რომ სააკაშვილზე სადეპუტატო კითხვით მინისტრს ადამიანის უფლებათა კომიტეტის თავმჯდომარემ, მიხეილ სარჯველაძემ მიმართა.

სააკაშვილი უკვე 37-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს. ამ ეტაპზე სააკაშვილი უარს ამბობს ექიმების კონსილიუმთან თანამშრომლობაზე.