ხშირად დაუგეგმავად თუ დიდხნიანი ნატვრის შემდეგ სხვადასხვა ადამიანთან ერთად გვიწევს ცხოვრება, რასაც სირთულეები და გაცრუებული იმედებიც თან სდევს. იმის გათვალისწინებით, რომ ხანდახან საკუთარი ოჯახის წევრებთანაც კი წვრილმან დეტალებზე უთანხმოება მოგვდის, სრულიად უცხო ადამიანთან ცხოვრების დაწყება რომ უფრო სარისკოა, ალბათ, ამაზე ყველანი ვთანხმდებით.

არც ის არის გამორიცხული, ადამიანს მთელი ცხოვრება იცნობდე, მაგრამ თანაცხოვრებისას უამრავი ისეთი დეტალი აღმოაჩინო, რაც აქამდე არ შეგიმჩნევია და არც მოგწონს. მოკლედ, სტატიაში იმ ტიპის რუმმეითებს გაეცნობით, რომლებთანაც ცხოვრება რთულია, მაგრამ თან დიდი გამოცდილების მომცემი.

სპოილერი: სტატიის წაკითხვის შემდეგ მინიმუმ 10 ტიპის ადამიანის გამორიცხვის შესაძლებლობა გეძლევათ, თუ სხვასთან ერთად თანაცხოვრებას აპირებთ.

1. წვეულების მოყვარული

თუ საკუთარ სახლში შესვლისას ხშირად ფიქრობთ, რომ მისამართი აგერიათ, ესე იგი, თქვენ წვეულებების მოყვარული რუმმეითი გყავთ. თქვენს საწოლზე ჩამომსხდარი ადამიანების უმრავლესობას თუ ვერ ცნობთ, არა უშავს, დიდი შანსია, მათ არც თქვენი რუმმეითი იცნობდეს.

გირჩევთ, ასეთი შეკრებების სიხშირეზე გონივრული ლიმიტი თავიდანვე განსაზღვროთ ან მინიმუმ ის მაინც შეგატყობინონ, როდის იგეგმება "წვეულება". წინააღმდეგ შემთხვევაში, დედლაინის წინ გამწარებული მუშაობის დროს ვინმე ექსტრემის მოყვარული თქვენს გაცნობას შეეცდება და ისედაც დაძაბულ საათებს უარეს ჯოჯოხეთად გიქცევთ.

2. გინდ ყოფილა, გინდ არა

ამ კატეგორიის რუმმეითები ხშირად კვირაობით იკარგებიან და შეიძლება, თანდათან იმის განცდაც გაგიჩნდეთ, რომ სრულიად მარტო ცხოვრობთ. თავიდან კი გაფრთხილებენ, მაგრამ ცოტა ხნის შემდეგ აღარც ამის შეტყობინებით იწუხებენ თავს.

აქ ჩამოთვლილი რუმმეითებიდან, ალბათ, ყველაზე სასურველი სწორედ ეს კატეგორიაა. თუმცა მათთან ერთად ცხოვრებას ერთი პრობლემა მაინც ახლავს თან: მისი მშობლები, ნათესავები და შორეული მეგობრები ყოველ საღამოს მისტიკურ გარემოებაში თქვენგან ელიან პასუხს, თუ სად არის ის ამჯერად.

3. ჩუმად პრეტენზიული

ამ ტიპის რუმმეითები, ერთი შეხედვით, ძალიან საყვარელი და თავაზიანი ადამიანების შთაბეჭდილებას ტოვებენ, მაგრამ არაფერი შეგეშალოთ! რეალურად, მათ ბევრი რაღაც არ მოსწონთ, მაგრამ ამის შესახებ არასდროს არაფერს ამბობენ. რა თემაზეც უნდა სცადოთ საუბარი, როგორი გასართობი იდეაც უნდა შესთავაზოთ ან რამდენჯერაც მისი საყვარელი ტკბილეულით მზრუნველობა გამოხატოთ, ისინი გულწრფელად არასდროს დაგელაპარაკებიან.

ასე რომ, ნურც იმაზე ფიქრით დაიტანჯავთ თავს, ეს ადამიანები საერთოდ საიდან მოვიდნენ და არც იმაზე იღელვოთ, შემდეგ რა მიზეზით წავლენ. ამას ვერასდროს გაიგებთ!

4. დალაგების ობსესიით შეპყრობილი

ჰიგიენის საწინააღმდეგო, ალბათ, არავის არაფერი გვაქვს, მაგრამ სუფთა ჭურჭლის თავიდან დარეცხვის ფაქტს თუ შეესწრებით, სამომავლოდ ფრთხილად იყავით! დალაგების ობსესიით შეპყრობილ ადამიანებთან ცხოვრებისას არც იმან უნდა გაგაკვირვოთ, რომ საღამოსთვის შერჩეული კაბა სარეცხ მანქანაში დაგხვდეთ. რატომ? იმიტომ რომ იფიქრა, იქნებ ესეც ჭუჭყიანი ხომ არ იყოო.

ასეთ დროს ერთადერთი რჩევა ის იქნება, რომ თავიდანვე შეთანხმდეთ ერთმანეთის ნივთების ხელშეუხებლობაზე. იქნებ ეს მცდელობა თქვენს შემთხვევაში მაინც წარმატებული აღმოჩნდეს.

5. მეწვრილმანე

ასეთი რუმმეითები საკმაოდ სასურველი თანამაცხოვრებლების შთაბეჭდილებას ტოვებენ. არც გადასახადების გადახდას აგვიანებენ და არც მაღაზიიდან საჭირო ნივთების ამოტანა ავიწყდებათ, მაგრამ არ შეცდეთ, ყველაფერი ასე მარტივად ვერ იქნება.

როცა პირველად მოგთხოვთ, რომ გაზის დავალიანება 17 ლარი და 67 თეთრი ზუსტად შუაზე გაიყოთ, შეიძლება გაგეცინოთ და ხუმრობად ჩათვალოთ. აი, ერთად შეძენილი კევის დათვლისას თუ გამოიჭერთ, უკვე ნამდვილად დაფიქრება გმართებთ, იქნებ საერთოდ არ იცნობთ ამ ადამიანს? ბოლოს კი, დილით სამსახურისკენ მორბენალს ყავის სათავსო ცარიელი შეიძლება დაგხვდეთ, რადგან თქვენმა რუმმეითმა მოგზაურობისას თან გაიყოლა. მიზეზი მარტივია: ბოლოს ხომ ყავა მან შეიძინა?!

6. ხმაურიანი

ასეთი რუმმეითების ხმა მაშინაც კი გესმის, როცა სახლში არ არიან. ამის მიზეზი კი ის არის, რომ სიმშვიდის არსებობის აღარ გჯერა. თუ თვლით, რომ ხმაურიანი რუმმეითები გაუჩერებელი ლაპარაკით მხოლოდ მაშინ გაწუხებენ, როცა დაკავებულები ხართ, ცდებით.

მათ თითოეულ მოძრაობას, სახლიდან მუშაობას, მეცადინეობას და გართობასაც კი, სიმშვიდის დარღვევა შეუძლია. ეს განსაკუთრებით მტკივნეული მაშინ არის, როცა თქვენ დილის 7 საათზე გაღვიძებას სულაც არ აპირებდით, მაგრამ მათი სახლიდან გასვლისა და მომზადების რიტუალი ნახევრად სიზმარში გადაგეზრდებათ და ბოლოს აღარ გჯერათ, რომ ნამდვილად წავიდა და უკვე მარტო ხართ.

ბონუსი: როგორც წესი, მათი მეგობრებიც ხმაურიანები არიან ხოლმე.

7. მოუწესრიგებელი

მართალია, თავის მოვლა ან საკუთარი ჩაცმულობის არჩევა ყველა ადამიანისთვის ინდივიდუალური საკითხია და ამაში ჩარევის უფლება ნამდვილად არ გვაქვს. თუმცა პირად ჰიგიენაში არსებობს რაღაც ზღვარი, რომლის გადალახვითაც შენთან თანამცხოვრები ადამიანი უსიამოვნო მდგომარეობაში შეიძლება ჩააგდო.

თუ სახლში დაბრუნებული სუფთა ჭიქას ვერ პოულობთ, რათა ყავა მოიმზადოთ, ეს იმის პირველი ნიშანია, რომ თქვენი რუმმეითი მოუწესრიგებელი ადამიანია. როგორც წესი, ამას თან სდევს მუდმივად უწესრიგოდ მიყრილი ნივთები და სახლის დალაგების მუდმივი პრობლემა, რომელიც რატომღაც მხოლოდ თქვენი ვალდებულებაა. ამ სიტუაციის მოგვარების გზა რთული საპოვნელია, რადგან ზრდასრული ადამიანის ჩვევების შეცვლის მცდელობა, ძირითადად, უშედეგოა.

8. იდეოლოგიებით შეპყრობილი

რამდენადაც არ უნდა მოგვწონდეს სხვა ადამიანების მსოფლმხედველობა, მათ ვერ ვაიძულებთ, რომ თავიანთ რწმენებზე უარი თქვან. თუმცა მედლის მეორე მხარეა, როცა თითქმის ფანატიკურად განწყობილი რუმმეითები ჩვენს ინდოქტრინაციას საკმაოდ სახალისო და უცნაური მეთოდებით ცდილობენ.

თუ თქვენს საერთო ოთახში რელიგიური ნივთების რაოდენობა ნელ-ნელა იმატეს, ეს მხოლოდ დასაწყისია. თანდათან თქვენი პირადი სივრცე არა მხოლოდ პირდაპირი გაგებოთ ვიწროვდება, არამედ მენტალურადაც. ამას თან სდევს გაუთავებელი და წრიული არგუმენტების მქონე საუბრები პოლიტიკის, ეკონომიკისა და ადამიანთა უფლებების შესახებ, რაზეც ვერც ვერასდროს შეთანხმდებით. ალბათ, საუკეთესო გამოსავალია, რომ ამ ყველაფერს იუმორით შეხედოთ და დიალოგისას კარგადაც გაერთოთ, თუმცა ბოლოს ესეც ძალიან მომაბეზრებელი ხდება.

9. ის, ვისთვისაც პირადი სივრცე უცხო ხილია

თუ პერიოდულად ამჩნევთ, რომ თქვენმა ნივთებმა სახლიდან წასვლა და უკან დაბრუნება დაიწყეს, სანამ მისტიკაზე ფიქრს დაიწყებთ, ჯერ თქვენი რუმმეითი გაიხსენეთ. არც ისე ხშირი შემთხვევაა, მაგრამ არსებობენ ადამიანები, რომლებიც პირად და საერთო საკუთრებას შორის საზღვარს ვერ ავლებენ.

თუ ამის განმარტების შემდეგ პრობლემა მოგვარდა, მაშინ გაგიმართლათ. სხვა შემთხვევაში, ზოგჯერ მოდის ახალი ტენდენციების დამკვიდრება და ქუჩაში ისეთი თავდაჯერებული მზერით სიარულის შესწავლა მოგიწევთ, თითქოს თქვენს ჩაცმულობაში არც არაფერია უცნაური: თქვენს გარდერობში პირად სამოსს რომ ვეღარ იპოვით, მოგიწევთ, იმის ჩაცმას დაჯერდეთ, რაც რუმმეითმა თქვენთვის დატოვა.

10. კონკურენტი

ჩვენ იმ სამყაროში ვცხოვრობთ, რომლის მამოძრავებელი ღერძიც კონკურენციაა და თან ამას ადრეული ასაკიდან, სკოლაშივე, გვაჩვევენ. აქედან გამომდინარე, მესმის იმ ადამიანების, რომლებიც კონკურენციას სრულიად უადგილო სიტუაციებშიც კი ხედავენ, მაგრამ ეს მაინც სახალისოა.

თუ თქვენ ბოლო პერიოდში ტექნიკა განაახლეთ ან ფეხსაცმელი/ტანსაცმელი შეიძინეთ, თქვენი კონკურენტი რუმმეითი არაფრით არ უნდა ჩამოგრჩეთ და დაახლოებით ერთ კვირაში იმავე კატეგორიის ნივთის ყიდვას სხვათა შორის გამცნობთ. შეგიძლიათ, გამიზნულად სწორედ ის ნივთი შეიძინოთ, რისი შეცვლის საჭიროება მას ნამდვილად არ აქვს და რეაქციას ჩუმად დააკვირდეთ. ერთი შეხედვით, ეს იდეა საკმაოდ სასტიკად ჟღერს, მაგრამ ცხოვრება თავადაც ხომ უნდა გავიხალისოთ.

და ბოლოს, დიდი ალბათობით, იდეალური რუმმეითები არ არსებობენ და სხვებისთვის არც ჩვენ ვართ ასეთები. ვიღაცას შეიძლება ლეპტოპზე აკრეფილი ასოების ხმითაც კი ვაღიზიანებთ, ვიღაცას კი — საწოლში გადატრიალებით.