გირჩი — მეტი თავისუფლების ლიდერის, ზურაბ ჯაფარიძის განცხადებით, თვითმართველობაში ოპოზიციის ყოფნა კი არა, თვითმმართველობასა და ცენტრალურ ხელისუფლებაში ქართული ოცნების ყოფნა არის საფრთხე. მისივე თქმით, ქვეყნისთვის უმჯობესი იქნება, თუ სადმე ოპოზიცია იქნება უმრავლესობაში და "არჩეულ მერს და მერის კაბინეტს როგორ დაუპირისპირდებიან, მაგასაც ვნახავთ".

"საფრთხე არის, როცა თვითმმართველობაშიც და ცენტრალურ ხელისიუფლებაშიც არის ქართული ოცნება. ეგ არის პრობლემა. სადაც ეგენი არიან, იქ არის პრობლემა, თორემ საფრთხე... ოპოზიციის წარმომადგენლები თუ იქნებიან სადმე უმრავლესობაში, პირიქით, ეგ არის კარგი ქვეყნისთვის. მე მგონი, ამის ახსნა ამ ქვეყნის ბევრ მოქალაქეს არ სჭირდება.

სინამდვილეში პრობლემა არის და საფრთხე ქვეყნისთვის არის, როცა ესენი არიან ხელისუფლებაში, გინდა ცენტრში იყვნენ, გინდა რეგიონებში, გინდა ადგილობრივ თვითმმართველობაში. არანაირი პრობლემა არ იქნება, სადაც გავიმარჯვებთ. ყველგან გავიმარჯვებთ, ბევრგან გავიმარჯვებთ, საბოლოო ჯამში, იქნება ამ ხელისუფლების დასასრულის დასაწყისი და ეგ არის კარგი. საფრთხე კი არ არის, ეგ არის კარგი", — განაცხადა ჯაფარიძემ ფორმულასთან.

ირაკლი ღარიბაშვილი რაიონებში წინასაარჩევნო შეხვედრებზე ოპოზიციის მადისკრედიტირებელ განცხადებებს აგრძელებს. პრემიერმინისტრმა სენაკში შეხვედრის შემდეგ მედიასთან განაცხადა, რომ ენმ-ის სენაკის მერობის კანდიდატს, კობა ნაყოფიას სენაკის მერობა სურს, როცა იქ სახლიც კი არ აქვს. მისი თქმით, თუ ნაყოფია გაიმარჯვებს, "არანაირი პერსპექტივა არ აქვს", რადგან ცენტრალური ხელისუფლება მათ ხელშია.

ამასთანავე, 21 ოქტომბერს ზუგდიდში ღარიბაშვილმა განაცხადა, რომ ნაციონალური მოძრაობის მერობის კანდიდატს, ანზორ მელიას მუნიციპალიტეტის მართვის "წარმოდგენა არ აქვს", ხოლო ქართული ოცნებას "ღირსეული ზუგდიდელი" და "უწესიერესი კაცი" ჰყავს კანდიდატად.

ამავე თემაზე: