ესპანეთის პრემიერმინისტრმა პედრო სანჩესმა სექსმუშაკთა საქმიანობის შეზღუდვის გეგმა წარმოადგინა, მაგრამ ექსპერტთა ნაწილი ფიქრობს, რომ ეს ამ ინდუსტრიას გაცილებით საშიშს გახდის და დასაქმებულ ქალებს მეტი საფრთხე შეექმნებათ.

"თუ პროსტიტუციას, რომელიც დასაქმებულ ქალებს მონებად აქცევს, აღმოვფხვრით, მაშინ ეს ჩვენი ქვეყნისთვის წინგადადგმული ნაბიჯი იქნება", — განაცხადა სანჩესმა სოციალისტური მუშათა პარტიის კონფერენციაზე.

სექსმუშაკთა დამცველი ჯგუფები პრემიერმინისტრის განცხადებას არ ეთანხმებიან. "მიდგომა, რომელიც სექსმუშაკების საქმიანობას დანაშაულებრივ ქმედებად აქცევს, ამ ადამიანებისთვის დამანგრეველი შედეგების მომტანი იყო ყველა ქვეყანაში, სადაც ასეთი გადაწყვეტილება მიიღეს" — განაცხადა სექსმუშაკთა უფლებების ევროპული ალიანსის წარმომადგენელმა.

"COVID-19-მა სექსმუშაკების ცხოვრება მთელს მსოფლიოში გააუარესა, მათ შორის ესპანეთშიც, სადაც ბევრ მათგანს უსახლკარობა და სიღარიბე ემუქრება. სანჩესისთვის პრიორიტეტი ამ ადამიანებთან შეხვედრა, მათი პრობლემების განხილვა და შესაფერისი პოლიტიკის შემუშავება უნდა იყოს", — დასძინა წარმომადგენელმა.

ესპანეთში პროსტიტუციის დეკრიმინალიზაცია 1995 წელს მოხდა, თუმცა მასთან დაკავშირებული ზოგიერთი საქმიანობა ისევ დანაშაულად ითვლება, მაგალითად, სექსმუშაკსა და მისით დაინტერესებულ პირს შორის შუამავლობა. ესპანეთში პროსტიტუცია დღემდე არ არის აღიარებული, როგორც სამუშაო და არც სამართლებრივი სტატუსი აქვს.