საქართველოს შინაგან საქმეთა სამინისტრომ საზოგადოებრივ მაუწყებელში შეჭრის ფაქტზე რამდენიმე ადმიანი მოწმის სახით დასაკითხად დაიბარა. ამის შესახებ On.ge-ს უწყების პრესსამსახურში განუცხადეს.

როგორც აუდიტიორია115-ის ფეისბუკ გვერდზე გამოქვეყნებულ ინფორმაციაში წერია, დაკითხვაზე დაბარებულ ადამიანებს შორის არის მათი მოძრაობის ერთ-ერთი წევრი, გიორგი სოფრომაძე. მათივე ინფორმაციით, გასაუბრება 24 მარტსაა დაგეგმილი. თუმცა, შსს-ში არ აკონკრეტებენ, როდის დაკითხავენ დაბარებული მოწმეებს.

"საზოგადოებრივი მაუწყებლის ფოიეში ჩატარებული აქცია-პერფორმანსის შედეგად არ დაზიანებულა ტელევიზიის ინფრასტრუქტურა, საფრთხე არ შექმნია დაწესებულების არცერთ თანამშრომელს. მოძრაობის წევრებს ხელი არ შეუშლიათ საეთერო სტუდიების მუშაობისათვის. ჩვენ მხოლოდ საშვების გარეშე შევედით ჩვენი კუთვნილი მაუწყებლის მთავარ დერეფანში, საიდანაც შეუძლებელი გახლდათ რომელიმე გადაცემის ჩაშლა ან მისი მიმდინარეობის შეფერხება," - ვკითხულობთ აუდიტორია 115-ის ფეისბუკ გვერდზე.

საქმეზე გამოძიება სისხლის სამართლის კოდექსის 239-ე მუხლით მიმდინარეობს, რაც გულისხმობს:

  • ხულიგნობა, ესე იგი ქმედება, რომელიც უხეშად არღვევს საზოგადოებრივ წესრიგს და გამოხატავს საზოგადოებისადმი აშკარა უპატივცემულობას, ჩადენილი ძალადობით ან ძალადობის მუქარით ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ან გამასწორებელი სამუშაოთი ვადით ერთ წლამდე ანდა თავისუფლების აღკვეთით იმავე ვადით.
  • იგივე ქმედება ჩადენილი წინასწარი შეთანხმებით ჯგუფის მიერ, ხელისუფლების წარმომადგენლის ან ხულიგნობის აღმკვეთი სხვა პირის მიმართ ან ხულიგნობისათვის მსჯავრდებულის მიერ ისჯება ჯარიმით ან საზოგადოებისათვის სასარგებლო შრომით ვადით ას ოთხმოციდან ორას საათამდე ან გამასწორებელი სამუშაოთი ვადით ერთიდან ორ წლამდე ანდა თავისუფლების აღკვეთით ვადით ორიდან ხუთ წლამდე. თუ ეს ქმედება ცეცხლსასროლი იარაღის ან იარაღად სხვა საგნის გამოყენებით არის ჩადენილი ისჯება თავისუფლების აღკვეთით ვადით ოთხიდან შვიდ წლამდე.

საზოგადოებრივ მაუწყებლთა მიმდინარე აქციის მონაწილეები ტელევიზიის შენობაში მიმდინარე წლის 9 თებერვალს შეჭრენენ.