პრემიერმინისტრის, ირაკლი ღარიბაშვილის განცხადებით, ქართულმა ოცნებამ დამაჯერებლად გაიმარჯვა და 47%-იანი შედეგით კიდევ ერთხელ მოიპოვა მოსახლეობის ნდობა და მანდატი. რაც შეეხება ოპოზიციას, მისი თქმით, "ნაციონალური მოძრაობა და დესტრუქციული ძალები, კიდევ ერთხელ, მერვედ დამარცხდნენ ქართველ ხახლთან და ქართულ ოცნებასთან ბრძოლაში".

"მინდა, პირველ რიგში, ჩვენს მოსახლეობას მივულოცო არჩევნების წარმატებულად ჩატარება. არჩევნები ჩატარდა წარმატებულად, მშვიდ, თავისუფალ და სამართლიან გარემოში და საერთაშორისო დამკირვებლების მხრიდან შეფასდა ცალსახად პოზიტიურად. ქართულმა ოცნებამ მთელი საქართველოს მასშტაბით დამაჯერებლად გაიმარჯვა და 47%-იანი შედეგით კიდევ ერთხელ მოიპოვა მოსახლეობის ნდობა და მართვის მანდატი. ამისთვის მე მინდა გულწრფელი მადლობა გადავუხადო ჩვენს მოსახლეობას, ჩვენს ამომრჩეველს, კიდევ ერთხელ გამოცხადებული ნდობისთვის და მართვის მანდატის დამტკიცებისთვის. დიდი პატივია და დიდი პასუხისმგებლობა", — განაცხადა მან.

ღარიბაშვილი ამტკიცებს, რომ არჩევნების შედეგებით კმაყოფილია და 20 მუნიციპალიტეტში მეორე ტურის დანიშვნა მათთვის დამაკმაყოფილებელი შედეგია. მისი თქმით, ოპოზიციამ ვერ შეძლო მიეღწია სასურველი მიზნისთვის და ვერ დააფიქსირეს ის შედეგი, რომლითაც შეეცდებოდნენ "ქვეყანაში პოლიტიკური კრიზისის პროვოცირებას და არეულობის შემოტანას".

"64 მუნიციპალიტეტიდან მხოლოდ 20-ში, ანუ 31%-ში დაინიშნა მეორე ტურები, აქვე შეგახსენებთ, რომ 2020 წლის საპარლამენტო არჩევნებისას მეორე ტური დაინიშნა ოლქების 56%-ში. შესაბამისად, ეს ჩვენთვის მისასალმებელი შედეგია და ხაზს უსვამს იმ დემოკრატიულ და სამართლიან საარჩევნო გარემოს, რომელიც საქართველოში სწორედ ქართული ოცნების ძალისხმევით შეიქმნა.

ასევე, მინდა გითხრათ, რომ ჩვენი კანდიდატები მეორე ტურებში 20-ვე საარჩევნო ოლქში დამაჯერებლად გაიმარჯვებენ და რაც მთავარია, ჩვენთან ერთად გაიმარჯვებს ჩვენი ქვეყანა, ჩვენი მოსახლეობა", — განაცხადა პრემიერმინისტრმა.

მან ამომრჩევლებს ნდობისა და ერთგულებისთვის მადლობა გადაუხადა და განაცხადა, რომ ამ ნდობას გამართლებენ.