"მათ ვულოცავ, რომ რამდენიმე თვის წინ სრულად დიკრედიტირებული ნაცმოძრაობა გააცოცხლეს", — ასე ეხმაურება პარტია საქართველოსთვის ერთ–ერთი ლიდერი, ანა ბუჩუკური არჩევნების პირველად შედეგებს.

"მექნებოდა უბრალოდ ერთი შეფასება, მათ ვულოცავ, რომ რამდენიმე თვის წინ სრულად დიკრედიტირებული, სრულად დისკრეტირებული ნაცმოძრაობა გააცოცხლეს, იმდენად იყვნენ გართულები ჩვენთან ბრძოლაში, რომ მოახერხეს და ნაცმოძრაობა გააცოცხლეს, ყოჩაღ მათ", — ამბობს ბუჩუკური.

ამასთან, ბუჩუკური აღნიშნავს, რომ პარტია ყველა სამართლებრივ ბერკეტს გამოიყენებს, რათა საკუთარი ამომრჩევლის ხმები დაიცვას.

დღეს, 3 ოქტომბერს ქართული ოცნების თავმჯდომარემ, ირაკლი კობახიძემ განცხადა, რომ საქართველოში თვითმმართველობის არჩევნების მეორე ტური 30 ოქტომბერს გაიმართება.

ცესკომ პირველადი მონაცემები უკვე გამოაქვეყნა, რომელთა მიხედვითაც, თბილისში მეორე ტური ჩატარდება. მანამდე, 2 ოქტობერს, ეგზიტპოლების შედეგების შემდეგ, მმართველმა პარტიამ ოფისთან საგანგებოდ მოწყობილ სცენაზე იზეიმა. იმედის დაკვეთით ჩატარებული GORBI-ის კვლევის მიხედვით, ქართულ ოცნებას 47%-ზე მეტი უნდა აეღო, ხოლო თბილისში მეორე ტური არ ინიშნებოდა.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.