TV პირველმა გაავრცელა ვიდეო, სადაც ჩანს, რომ საარჩევნო უბნის მიმდებარე ტერიტორიაზე პირი გადამღებ ჯგუფს თავს დაესხა და კამერა დაუზიანა. TV პირველის ცნობით, იგი ქართული ოცნების აქტივისტია.

"რამდენიმე საათია, ბატონო, ამ ტერიტორიაზე დაგაფიქსირეს, ფოტოსურათიც კი არსებობს" — მიმართავს ჟურნალისტი კაცს, რომელიც შემდეგ ჟურნალისტსა და ოპერატორს დაემუქრა.

"მერე რა გინდა, გაწიე მაგ კამერა თორე გადაგამტვრევ თავზე იცოდე" — ამბობს იგი გავრცელებულ ვიდეოში და კამერას ხელს ურტყამს.

აღნიშნულთან დაკავშირებით On.ge შინაგან საქმეთა სამინისტროს დაუკავშირდა, მათ პასუხს მიღებისთანავე შემოგთავაზებთ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.