ევროპული საქართველოს ლიდერმა, გიგა ბოკერიამ ხმის მიცემის შემდეგ წლევანდელი თვითმმართველობის არჩევნების მნიშვნელობას გაუსვა ხაზი და საზოგადოებას საკუთარი მოქალაქეობრივი ვალის შესრულებისკენ მოუწოდა. მისი თქმით, ამ არჩევნებით საქართველო თავის ისტორიულ ამოცანას დაუახლოვდება, რომ პოსტსაბჭოთა სივრცე გაარღვიოს და თავისუფალი სამყაროს ნაწილად იქცეს.

"ხმის მიცემის უფლება უფლებაა, რომ შენი ქვეყნის ბედი გადაწყვიტო, საკუთარი თავის ბედის პატრონი იყო, შენი საზოგადოების, შენი სამშობლოსი, ეს ერთ-ერთი უდიდესი მონაპოვარია და ყველა ვითარებაში, საერთოდ არაფერი რომ არ ხდებოდეს, მე მიმაჩნია ჯერ მონაპოვრად, მერე სამოქალაქო ვალად მოქალაქის, რომ ეს უფლება გამოიყენოს და იყოს პასუხსიმგებელი საკუთარი ქვეყნის თავისუფლების, საკუთარი თავისუფლების და საკუთარი მომავლის დაცვაზე. [...]

გავრისკავ და ვიტყვი, რომ შეიძლება ეს არჩევნები და ეს დღე ყველაზე მნიშვნელოვანი აღმოჩნდეს, როგორც საფრთხის თვალსაზრისით, თუ ჩვენ ჩვენი ნება ახლა ვერ ვაჩვენეთ, ისე გარღვევის თვალსაზრისით, რომ ჩვენ ჩვენს ისტორიულ ამოცანას დავუახლოვდეთ და ეს მისია შევასრულოთ, რომ გავაღწიოთ ამ პოსტსაბჭოთა ჭაობიდან და ვიყოთ ქვეყანა, რომელიც არის ნაწილი თავისუფალი სამყაროსი", — აცხადებს ბოკერია.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.