ქართული ოცნების თავმჯდომარემ, ირაკლი კობახიძემ განაცხადა, რომ გახარიას მხრიდან საუბარი იმაზე, რომ არ იცოდა სახელმწიფო უსაფრთხოების სამსახური რას აკეთებდა, სირცხვილია, რადგან მისივე თქმით, სუს-ის უფროსის მოადგილე ყოფილი პრემიერმინისტრის კადრი იყო.

"ამაზე რა კომენტარი უნდა გავაკეთოთ, რომ გახარიამ არ იცოდა სუს რას აკეთებდა, მე არ ვიცი, [...] როდესაც სუს-ის უფროსის მოადგილე, რომელიც პასუხისმგებელი იყო კონკრეტულად ამ მიმართულებაზე იყო მისი კადრი და ამბობს ის, რომ არაფერი არ იცოდა ამასთან დაკავშირებით, ეს არის სირცხვილი. [...] ხოჯევანიშვილი რას აკეთებდა პირდაპირ ეთქვა გახარიასთვის, მისი კადრი იყო, ნუ სირცხვილია ამაზე საუბარი", — განუცხადა კობახიძემ ჟურნალისტებს.

ყოფილი პრემიერმინისტრი, გიორგი გახარია ამტკიცებს, რომ არ ჰქონდა ინფორმაცია იმის შესახებ, რომ ქვეყანაში ასეთი მასშტაბური მოსმენები და მიყურადება მიმდინარეობდა. მისივე თქმით, არც პრემიერმინისტრობისას და არც შს მინისტრობისას არ იცოდა ამის შესახებ, მიუხედავად იმისა, რომ გავრცელებული ჩანაწერების ნაწილი, სწორედ მისი თანამდებობაზე ყოფნის თარიღებს ემთხვევა.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.