პრემიერმინისტრმა ირაკლი ღარიბაშვილმა ქედის მერობის კანდიდატის წარსადგენ 12-წუთიან სიტყვაში პირველი 6 წუთი ექსპრეზიდენტ მიხეილ სააკაშვილსა და ნაციონალურ მოძრაობაზე საუბარს დაუთმო. მან მიხეილ სააკაშვილს "მჩაგვრელი მასხარა" უწოდა.

"კაცი იყო 9 წელი პრეზიდენტი ჩვენი ქვეყნის, ხალხმა ე.ი. მანდატი მისცა ამხელა და საკუთარი ნებით კაცმა დატოვა პასპორტი. შემდეგ გააძევეს თმების თრევით, ნახეთ, სახურავზე დახტოდა, შემდეგ თმების თრევით გააძევეს და გუშინ გამოვიდა რაღაცებს კიდე აქეთ ჭკუას გვარიგებს და იმუქრება. ასეთი მასხარების დრო ქვეყანაში დასრულებულია, მეგობრებო, და თუ ჩამოსვლა უნდა, ჩამოვიდეს, გვაქვს ჰალსტუხების საკმაოდ დიდი კოლექცია, შეგვიძლია, რომ დავახვედროთ და კომფორტულად ვამყოფოთ ციხეში", — განაცხადა ღარიბაშვილმა.

შესავალი სიტყვა მან ეროვნული გმირის, გიორგი ანწუხელიძის დაბადების დღის მილოცვით დაიწყო და განაცხადა, რომ საქართველო ანწუხელიძის ქვეყანაა და არა "ლაჩარი სააკაშვილის".

"სწორედ გიორგი ანწუხელიძის ქვეყანა არის საქართველო და არა ლაჩრების და მოღალატეების, რომლებმაც ლაჩრულად მიატოვეს ჩვენი ჯარისკაცები, ჩვენი ქვეყანა და ჩვენი ხალხი აგვისტოს ომში. კაცმა, რომელიც იყო ე.წ. მთავარსარდალი, თქვენ ნახეთ კარგად, იმ დროს როცა გიორგი ანწუხელიძე და მისნაირი გმირები თავს სწირავდნენ ჩვენს ქვეყანას და ჩვენს სამშობლოს, ჩვენი ხალხის და ჩვენი ტერიტორიების დაცვას, აი, ეს მასხარა კაცი, სააკაშვილი, ლაჩარი, რომელმაც მიწაზე გართხმულმა აჩვენა მთელ მსოფლიოს სირცხვილი და ჩვენი ერის სირცხვილი აჩვენა მთელ მსოფლიოს მისი სახით", — განაცხადა ირაკლი ღარიბაშვილმა.

მან თქვა, რომ 2012 წელს ბიძინა ივანიშვილის ლიდერობით ქართულმა ოცნებამ "ღირსეული გამარჯვება მოიპოვა", იქამდე კი საქართველო პარადოქსების ქვეყანა იყო, მაშინ, როცა "ასეთი არაკაცების და ასეთი ლაჩრების ხელში იყო".

"საქართველოს თითოეულ კუთხეში იყო ტერორი და განუკითხაობა. პრაქტიკულად, მთავრობის მუნდირის ქვეშ, კრიმინალები მართავდნენ ქვეყანას. ეს იყო მაფიოზური სახელმწიფო სააკაშვილის დროს. მაფიოზური კლასიკური გაგებით: 5 კაცი მართავდა, დაჯდებოდა, გადაწყვეტდა — ამას დახვრეტა, ამას დაჭერა, ამას გაკულაკება, კონფისკაცია ბიზნესის.

თქვენ არ გახსოვთ, ათასობით ადამიანი დაზარალდა, ჩამოართვეს ოჯახებს ბიზნესები, სახლები, კარი, მშობლები დაუხოცეს და ათას სისაძაგლეს ჩადიოდნენ, ციხეებში რაც ხდებოდა: ადამიანების გაუპატიურება, ჩაგვრა და საშინელი უთანასწორობა და უსამართლობა, მეგობრებო, და ასეთმა უღირსმა ადამიანებმა არ იციან, რომ ჩვენ, ქართველები ყოველთვის ღირსებით გამოვირჩეოდით, ჩვენ ვართ თავისუფალი, თავისუფლების მოყვარული, ღირსეული ერი და მტკიცე და გაუტეხელი ერი", — განაცხადა ღარიბაშვილმა.

მერობის კანდიდატის წარდგენისთვის განკუთვნილი 12-წუთიანის სიტყვის მხოლოდ შუაში ღარიბაშვილმა უშუალოდ კანდიდატზე დაიწყო საუბარი, მანამდელი განცხადებები კი ასე შეაფასა:

"ეს ცოტა გართობისთვის, რა თქმა უნდა, ახლა რაც შეეხება საქმეს...".