ცოტა ხნის წინ ტიკტოკზე მომხმარებლების ჯგუფი გამოჩნდა, რომლებიც პლატფორმაზე ტროლებისა და ყალბი ანგარიშების უკან მდგარი ადამიანების ვინაობებს ამხელს მათი თანამშრომლებისა და მშობლების წინაშე.

ჯგუფს, სახელად The Great Londini-ს, საკუთარი ვებსაიტი, ტვიტერის ანგარიში და იუთუბარხიც აქვს, თუმცა, ყველაზე დიდი პლატფორმა ტიკტოკია. აქ მათ 2,3 მილიონზე მეტი გამომწერი ჰყავთ. ჯგუფის წევრები მოკლე ვიდეოებში ნიღბებით ჩნდებიან და კიბერბულერების რეალურ იდენტობას თავიანთ აუდიტორიას უმჟღავნებენ.

მაგალითად, ერთ-ერთი ვიდეოში, The Great Londini-მ ის კაცი გამოააშკარავა, რომელიც ახალგაზრდა პოლიციელს თავისი იარაღის შეჭმისკენ მოუწოდებდა. ჯგუფის ერთ-ერთმა წევრმა ყალბი ანგარიშის მფლობელი კაცის ფოტო, სახელი და პროფესიაც კი გამოაქვეყნა.

"სამსახურში ოდესმე აიყვანდით ისეთ იურისტს, რომელიც პოლიციის ოფიცერზე ასეთ კომენტარს აკეთებს? არც ჩვენ. ასე რომ, რა ვქნათ? უნდა ვთქვათ — სულელური თამაში სულელურ პრიზს იმსახურებს".

BBC-სთვის მიცემულ ინტერვიუში კაცმა, სახელად ლეომ, ჯგუფის სახელით ისაუბრა. მისი თქმით, ის, უბრალოდ, "სახეა" მოხალისეების იმ ჯგუფის, რომელსაც სამხედრო და კიბერუსაფრთხოების უზრუნველყოფის გამოცდილება აქვს და სურს, კონკრეტული სახელის ქვეშ ერთიანდებოდეს. ჯგუფის განცხადებით, ერთობლივი გამოცდილება საშუალებას აძლევს, ფარდა ახადოს ნებისმიერი ანგარიშის მფლობელის იდენტობას სულ რაღაც შვიდი-რვა კლიკით.

ლეო საკუთარ თავს "ანტიტროლს" უწოდებს და ამბობს, რომ ტიკტოკს კონტენტის მოდერაციასა და მოძალადე ანგარიშების ამოცნობაში პლატფორმისთვის მთელი ინფორმაციის გაგზავნით ეხმარება.

თუმცა, ტიკტოკს ჯგუფი დიდად არ მოსწონს. ლეოს თქმით, აპლიკაციამ The Great Londini-ის სახელთან დაკავშირებული ცხრა ანგარიში წაშალა და მეათე რამდენჯერმე დაბლოკა ონლაინ შევიწროებისა და ბულინგისთვის.

ჯგუფთან დაკავშირებული კითხვებისათვის ტიკტოკს არ უპასუხია, მაგრამ განაცხადა, რომ მხოლოდ 2021 წლის პირველ სამ თვეში 62 მილიონი ვიდეო წაშალა წესების დარღვევის გამო. პლატფორმის ცნობით, ეს მთლიანი კონტენტის 1 პროცენტზე ნაკლებია.