აჭარის ავტონომიური რესპუბლიკის შრომის, ჯანმრთელობისა და სოციალური დაცვის მინისტრმა, ზაალ მიქელაძემ რუსთავი 2–ის ეთერში განაცხადა, რომ დაშავებულთა რაოდენობა, ვინც საავადმყოფოებს მიმართა, ოცს აჭარბებს.

მინისტრის თქმით, დაშავებულთა შორის არიან პოლიციელები, რომელთაგან ერთს, სავარაუდოდ, ტვინის შერყევა აქვს.

ბათუმის რესპუბლიკური საავადმყოფოს ექიმმა, გია კიკაბიძემ კი თქვა, რომ კონკრეტულად ამ კლინიკას 11–მა პირმა მიმართა, მათგან ერთს აქვს ყვრიმალის ძვლის მოტეხილობა, რამდენიმე პირს აღენიშნება დაჟეჟილობა, ნაწილი კი ცრემლსადენი გაზით მოიწამლა.

სხვადასხვა მედიასაშუალების მიერ გავრცელებულ ვიდეოში ჩანს, თუ როგორ უშენენ აქციის მონაწილეები სამართალდამცავებს ქვებს, რის შემდეგაც სამართალდამცავებმა გამოიყენეს ცრემლსადენი გაზი.

ბათუმში, პოლიციის სამმართველოს შენობასთან მიმდინარე აქციაზე აჭარის პოლიციის უფროსის გადადგომასა და დაკავებულების გათავისუფლებას ითხოვენ. ყველაფერი იმით დაიწყო, რომ 11 მარტს პატრულმა მოძრაობის შეფერხებისთვის მოქალაქე დააჯარიმა, რასაც სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა.