დეკანოზ გიორგი მამალაძის ადვოკატი, გიორგი ფანცულაია ამბობს, რომ საზოგადოების აზრის შესაქმნელად, საქართველოს პროკურატურამ კონტექსტიდან ამოგლეჯილი და დამონტაჟებული ვიდეომასალა გაავრცელა. ის საგამოძიებო უწყებისგან ჩანაწერების სრულად გასაჯაროებას ითხოვს. მისი თქმით, გავრცელებული ვიდეოჩანაწერი მაქსიმუმია და "ამაზე მეტს პროკურატურა ვერ გაავრცელებს". ამის შესახებ ფანცულაიამ ტვ პირველის ეთერში განაცხადა.

დეკანოზის ადვოკატი სამ მიზეზს ამბობს, რის გამოც მისი დაცვის ქვეშ მყოფის დანაშაული არ მტკიცდება:

  • ვიდეომასალაში არ ჩანს, რომ გიორგი მამალაძემ ციანიდი იყიდა;
  • ვიდეომასალაში არ ჩანს, რომ ვინმეს მკვლელობა მზადდებოდა;
  • ვიდეომასალაში არ ჩანს, რომ შორენა თეთრუაშვილის მკვლელობა მზადდებოდა;

"ჟარგონზე [მარილზე გასვლა] თუ არის საუბარი, ამ ჟარგონის წარმოთქმის გამო, მამა გიორგი მამალაძის დაკავებით, თუ სახელმწიფო გადარჩა ტრაგედიას, როგორც მთავარი პროკურატურისგან მოვისმინეთ, მაშინ მინიმუმ მილიონ-ნახევარი ადამიანია დასაკავებელია ასეთი ფრაზებისთვის," - ამბობს დეკანოზის ადვოკატი, რომლიც კიდევ ერთხელ აღნიშნავს, რომ მისი დაცვის ქვეშ მყოფი ციანიდს შორენა თეთრუაშვილის თხოვნით ყიდულობდა.

საქართველოს პროკურატურამ რამდენიმე საათის წინ დეკანოზ გიორგი მამალაძის საქმეზე გამოძიების შუალედური შედეგები გაასაჯაროვა. გამოძიების დეტალებთან ერთად, უწყებამ გაასაჯაროვა საქმეში არსებული ფარული აუდიო-ვიდეო ჩანაწერები, სადაც საუბარია ციანიდზე. გამოძიება დეკანოზს საქართველოს მართლმადიდებლური ეკლესიის პატრიარქის მდივან-რეფერენტის, შორენა თეთრუაშვილის მკვლელობის მომზადებას ედავება.