ქართული ოცნების დეპუტატის, ირაკლი ქადაგიშვილის მტკიცებით, შალვა პაპუაშვილის მიერ, ფიზიკური ძალის გამოყენებით, თინა ბოკუჩავას პარლამენტის ტრიბუნიდან გაყვანა ძალადობა არ ყოფილა.

"არავითარი ქალზე ძალადობა არ ყოფილა, უბრალოდ არ მიუშვა, გამოსწია აქეთ. ჩვენ თუ ამას განვიხილავთ როგორც კაცსა და ქალს შორის ურთიერთობის ეტალონს, მაშინ სულ სხვა ლოგიკაში შევდივართ. თუ ჩვენ ამას განვიხილავთ, რომ ერთმა დეპუტატმა მეორე დეპუტატი პარლამენტის თავმჯდომარესთან არ მიუშვა და მის სკამზე დასმის საშუალება არ მისცა, ეს კიდევ სულ სხვა საკითხი არის. ძალადობა არის სხვა რამე", — განაცხადა ქადაგიშვილმა პალიტრანიუსის ეთერში.

ის ამბობს, რომ როდესაც სხდომათა დარბაზში "პროვოკაცია" ხდება და სხვა ყველა უძლურია, შეიძლება "ერთმა დეპუტატმა მეორე დეპუტატი არ მიუშვას არ მიუშვას პარლამენტის თავმჯდომარის სავარძელთან".

"როდესაც პერმანენტულად ხდება სხდომათა დარბაზი, რომელიც ითვლება საპარლამენტო და დემოკრატიის წმინდათა წმინდა ადგილად, პროვოკაციების ადგილი და მუდმივად ხდება თავდასხმა პარლამენტის თავმჯდომარის სავარძელზე, პარლამენტის თავმჯდომარეზე და ა.შ. იქ, როდესაც უკვე უძლური არის ყველა, შეიძლება, რომ ერთმა დეპუტატმა მეორე დეპუტატი არ მიუშვას არ მიუშვას პარლამენტის თავმჯდომარის სავარძელთან", — განაცხადა ქადაგიშვილმა.

ჟურნალისტის შენიშვნაზე, რომ "წესრიგის დასაცავად" არსებობს მანდატურის სამსახური, საპროცედურო საკითხთა და წესების კომიტეტის თავმჯდომარემ ასე უპასუხა:

"დარბაზში არის ოთხი მანდატური. ვეღარ აუდის მანდატურის სამსახური ამას".

18 ივლისს, ქართული ოცნების დეპუტატმა, შალვა პაპუაშვილმა კოლეგა, ნაციონალური მოძრაობის დეპუტატი თინა ბოკუჩავა ფიზიკური ძალის გამოყენებით გაიყვანა პარლამენტის თავმჯდომარის ტრიბუნიდან. როგორც ბოკუჩავა ამბობს, პირველად ამის მცდელობა ქართული ოცნების კიდევ ერთ დეპუტატს, ლევან მგალობლიშვილს, რომელსაც შემდეგ პაპუაშვილი შეუერთდა.

თავად პაპუაშვილი ამ ფაქტს ძალადობად არ მიიჩნევს. "დაბრალებებს არ ვიყოთ" — დაწერა მან სოციალურ ქსელში.

ნაციონალური მოძრაობა აპირებს ფაქტზე სამსჯელოდ პარლამენტის ეთიკის კომისიას მიმართოს.

მომხდარს გამოეხმაურა პრეზიდენტი, სალომე ზურაბიშვილი. ის ამბობს, რომ გაუმართლებელია ადამიანის უფლებების დარღვევა, მით უფრო პარლამენტში.

გაიგე მეტი: