საქართველოს პრემიერმინისტრის, ირაკლი ღარიბაშვილის განცხადებით, ხელისუფლებას აქვს გეგმა, ოკუპირებული აფხაზეთისა და ცხინვალის რეგიონის სოციალურ-ეკონომიკური განვითარების სტრატეგია შეიმუშავოს. ღარიბაშვილის თქმით, საწყის ეტაპზე გალისა და ახალგორის რაიონების სოციალურ-ეკონომიკური რეაბილიტაციის კონცეფციაც შეიქმნება.

"რაც შეეხება საგარეო მიმართულებით ჩვენს გაწერილ გეგმებს, რა თქმა უნდა, ჩვენი მთავარი ამოცანა ომით გაყოფილ საზოგადოებებს შორის შერიგებისა და ჩართულობის პოლიტიკის განხორციელება უნდა იყოს. გვაქვს გეგმა რომ შევიმუშავოთ აფხაზეთისა და ცხინვალის რეგიონის სოციალ-ეკონომიკური განვითარების სტრატეგიაც. საწყის ეტაპზე გალისა და ახალგორის სოციალ-ეკონომიკური რეაბილიტაციის კონცეფციას შევიმუშავებთ", — განაცხადა პრემიერმინისტრმა პარლამენტში ანგარიშისა და ქვეყნის განვითარების ათწლიანი გეგმის წარდგენისას.

მისივე თქმით, უზრუნველყოფილი იქნება რეგულარული თანამშრომლობა სამოქალაქო საზოგადოების წარმომადგენლებთან, მათ შორის, სპეციალურად შექმნილ ექსპერტთა საკონსულტაციო საბჭოს ფარგლებში.