"ჯო ბაიდენის ადმინისტრაციამ NATO-ს საქართველოსთვის მაპის უზრუნველყოფისკენ უნდა მოუწოდოს", — ამის შესახებ ამერიკელი სენატორი, რობ პორტმანი, The Wall Street Journal-ის საავტორო სვეტში წერს.

სტატიაში "როგორ შეუძლია ბაიდენს, ჟენევაში წინ აღუდგეს პუტინს", ის ბაიდენსა და პუტინს შორის დაგეგმილ შეხვედრასა და მის აღმოსავლეთ ევროპაში რამდენიმე დღის წინ გამართულ ვიზიტზე საუბრობს. ამ ვიზიტის ფარგლებში ის უკრაინაში, ლიეტუვასა და საქართველოში იმყოფებოდა და სტატიაში აღნიშნავს, რომ პირადად გახდა რუსეთის მხრიდან საქართველოს ოკუპაციისა და ბორდერიზაციის მოწმე.

"თითოეული მათგანი რუსეთის მხრიდან მზარდი ზეწოლის წინაშე დგას, მათ შორის საზღვრებზე სამხედრო საფრთხეები, კიბერშეტევები და პოლიტიკური დეზინფორმაციული კამპანიები. უკრაინასა და საქართველოში რუსეთი განაგრძობს უკანონოდ ანექსირებული ტერიტორიების ოკუპაციას და მილიტარიზაციას", — წერს რობ პორტმანი და აღნიშნავს, რომ საქართველო ამერიკის ერთ-ერთი უახლოესი მოკავშირეა რეგიონში, ამიტომ რუსეთის ქმედებები შეშფოთების მიზეზი უნდა გახდეს.

მისი აზრით, აშშ-მ ხელი უნდა შეუწყოს ბუქარესტის სამიტზე 2008 წელს უკრაინისა და საქართველოსთვის ჩრდილოატლანტიკურ ალიანსში გაწევრიანების შესახებ დადებული პირობის შესრულებას.

"როგორც უკრაინის შემთხვევაში, ბაიდენის ადმინისტრაციამ უნდა მოუწოდოს NATO-ს, უზრუნველყოს წევრობის სამოქმედო გეგმა საქართველოსთვის და ხელი უნდა შეუწყოს 2008 წლის ბუქარესტის სამიტზე გაჟღერებული პირობის შესრულებას. ორივე ქვეყნის ნატო-ში გაწევრიანების გზაზე დაყენება ხელს შეუწყობს მათ დაცვას რუსეთის აგრესიისგან", — წერს სენატორი პორტმანი.

ამ სტატიაში ის ასევე წერს, რომ "საარჩევნო, სასამართლო და ეკონომიკური რეფორმების განსახორციელებლად თანამშრომლობის აუცილებლობაზე, რაც უფრო უსაფრთხო მომავლისთვისაა საჭირო".

სენატროები ჯინ შაჰინი და რობ პორტმანი საქართველოში 2 ივნისს ჩამოვიდნენ ორპარტიული გზავნილით, რომ აშშ ქართველ ხალხს მხარში უდგას ქვეყნის დემოკრატიის გასაძლიერებლად. ვიზიტის ფარგლებში სენატორები საოკუპაციო ხაზთანაც იმყოფებოდნენ. ვიზიტის დასასრულს მათ განაცხადეს, რომ "რუსეთი აგრძელებს საქართველოში, უკრაინასა და ბელორუსში დაშინების პრაქტიკას" და "აშშ კვლავ რჩება საქართველოს მტკიცე პარტნიორად და რეფორმების მხარდამჭერად".