ნაციონალური მოძრაობის წევრის, ხატია დეკანოიძის განცხადებით, კვირას პარტიის პოლიტსაბჭო გაიმართება, სადაც ისინი პარლამენტში შესვლა-არშესვლაზე იმსჯელებენ.

"კვირას დადგება ეს საკითხი პოლიტსაბჭოზე. კი, ჩვენ უნდა ვიმსჯელოთ ამ საკითხზე, უნდა ვიმსჯელოთ მომავალი ბრძოლის სტრატეგიაზე, ზოგადად რა უნდა იყოს ახლა ყველაზე მნიშვნელოვანი წერტილები და იცით, რომ ადგილობრივი თვითმმართველობის არჩევნები მოდის. ამიტომ, შესაბამისად, რა თქმა უნდა, ფართო მსჯელობა გაიმართება და ამ საკითხზე კენჭისყრა იქნება გადაწყვეტილებამდე", — თქვა დეკანოიძემ მთავარ არხთან.

16 მაისს ნიკა მელია კიევში მიხეილ სააკაშვილთან შესახვედრად გაემგზავრა. მისი თქმით, საკაშვილი და ის ერთმანეთს საკუთარ ხედვებს გააცნობენ. მელიას განცხადებით, მასსა და ექს-პრეზიდენტ მიხეილ სააკაშვილს შორის ურთიერთობაზე ბევრი რამ არის დამოკიდებული.

6-თვიანი ბოიკოტის შემდეგ, ოპოზიციის ნაწილმა დოკუმენტს ხელი მოაწერა და 27 აპრილს პარლამენტში მივიდა. დოკუმენტს ხელს არ აწერს ნაციონალური მოძრაობა. პარტიაში ამბობდნენ, რომ დოკუმენტს ხელს ნიკა მელიას გათავისუფლებამდე არ მოაწერდნენ. აღსანიშნავია, რომ დოკუმენტს ინდივიდუალურად მოაწერა ხელი სალომე სამადაშვილმა.

ენმ-ს წევრების ცნობით, ამ ეტაპზე მსჯელობენ იმაზე, შევლენ თუ არა პარლამენტში. როგორც ნაციონალური მოძრაობის თავმჯდომარემ, ნიკა მელიამ 12 მაისს განაცხადა, პარლამენტში შესვლის შესახებ პარტიაში "მჭიდრო კონსულტაციები" მიმდინარეობს და გადაწყვეტილება უახლოეს პერიოდში იქნება ცნობილი.