საქართველოს ეკონომიკის მინისტრის განცხადებით, ერთი წამით რომ ეპარებოდეს ეჭვი ნამახვანჰესის სტრატეგიულ მნიშვნელობაში, ჟურნალისტების წინაშე არ იდგებოდა. ასე გამოეხმაურა მინისტრი მისი გადადგომის მოთხოვნას მედიასთან.

"მე ერთი წამითაც ეჭვი რომ მეპარებოდეს და არ ვიყო დარწმუნებული იმაში, რომ ქვეყნის დამოუკიდებლობა გადის ენერგოდამოუკიდებლობაზე და ეს პროექტი, ისევე, როგორც სხვა ადგილობრივი გენერაციის პროექტები, ძალიან სტრატეგიულია ჩვენთვის, თქვენ წინაშე არ ვიდგებოდი და არანაირი დამატებით მოწოდება არ დამჭირდებოდა. მაგრამ დარწმუნებული ვართ რა, რომ ერთად უნდა ვაშენოთ ძლიერი ენერგეტიკული სისტემა, ისეთი სისტემა, რომელიც იქნება დამოუკიდებელი და ჩვენი დამოუკიდებელი ეკონომიკისა და სუვერენიტეტის განმტკიცების საფუძველი, რომ ნამახვანჰესი, როგორც ერთ-ერთი თვალსაჩინო, კარგად მოკვლეული, სრულყოფილი პროექტი იქნება ამ სისტემის ერთ-ერთი მნიშვნელოვანი შენატანი, ამიტომაც ვაგრძელებთ მუშაობას", — განაცხადა მან.

ნათია თურნავამ თქვა ისიც, რომ მსხვილი ჰიდროსადგურები პროტესტს სხვა ქვეყნებშიც იწვევს და "რაღაცა განსაკუთრებული პროცესი ეს არ არის", მაგრამ ხელისუფლება ვალდებულია ყველა კითხვას გასცეს პასუხი. მისი განცხადებით, როცა საუბარია ეკოლოგიაზე, უსაფრთხოებაზე, პროექტის დეტალებზე, პასუხები უნდა გაიცეს კომპეტენტურად, ექსპერტების ჩართულობით და "არა ქუჩაში, არა კარვებში, არა მეგაფონის მოშველიებით.

"ეს არ არის სწორი ფორმატი იმისთვის, რომ მოსახლეობამ სიმართლე გაიგოს", — აღნიშნა მან.

თურნავა მიუთითებს, რომ კითხვებზე პასუხების გასაცემად რამდენიმე პლატფორმა შეიქმნა, კერძოდ, ექსპერტთა საბჭო და ევროკავშირის ენერგეტიკული გაერთიანების დავათა საბჭოს ხელმძღვანელის ჩართულობა. მისი თქმით, ყველა ამ პლატფორმის ფარგლებში და 12-თვიანი მორატორიუმის პირობებში, ნამახვანი გაცილებით უფრო სრულყოფილი პროექტი გახდება და ყველა კითხვას გაეცემა პასუხი. მინისტრმა აქტივისტებს "კონსტრუქციულ დიალოგში" ჩართვისკენ მოუწოდა.

"რაც შეეხება ულტიმატუმებს, რადიკალიზაციას, ეს არ არის სწორი გზა იმისთვის, რომ მართლაც გაირკვეს ყველა, მათ შორის ტექნიკური დეტალი, რაც შეეხება პროექტს. ულტიმატუმებით საუბარი მიუღებელი ხელისუფლების მიმართაც და საზოგადოების მიმართაც. განსაკუთრებით მიუღებელია მოწოდება იმისკენ რომ დავბლოკოთ, გავაჩეროთ, პარალიზება მოვახდინოთ", — ამბობს თურნავა და დასძენს, რომ პანდემიამ ისედაც ეკონომიკის თითქმის პარალიზება მოახდინა და ახლა "ქვეყანა უნდა გავხსნათ, ავამოქმედოთ, გამოვაცოცხლოთ და ტურისტებს დავახვედროთ უსაფრთხო და მიმზიდველი გარემო".

ეკონომიკის მინისტრმა თქვა ისიც, რომ როგორც სახელმწიფოს, ასევე, ინვესტორის მხრიდან თავდაპირველად იყო კომუნიკაციის პრობლემა და ბევრი ტყუილ-მართალი ვრცელდებოდა, რამაც რეალური სურათის დანახვა შეაფერხა, მაგრამ მას შემდეგ, რაც "ბატონმა ირაკლი ღარიბაშვილმა" მისცა "დავალება კომუნიკაციის", ენერგეტიკაზე და ენერგოდამოუკიდებლობაზე საუბარი ძალიან გააქტიურებულია.

"ჩვენი გეგმა არის იგივე, რაც იყო — დიალოგი, კომუნიკაცია. მაგრამ კომუნიკაცია უნდა მოხდეს სწორ ფორმატში, ექსპერტების, მეცნიერების ჩართულობით. შეუძლებელია ქუჩის რეჟიმში ვისაუბროთ სეისმიკაზე, გეოლოგიაზე და ჰიდრონაგებობების მდგრადობაზე. ეს არის ისეთი საკითხი, რომელიც უპრიანია, რომ გაირკვეს ექსპერტების ჩართულობით", — განაცხადა თურნავამ.

მეორე დღეა თბილისში, რესპუბლიკის მოედანზე ნამახვანჰესის საწინააღმდეგო აქცია იმართება. აქტივისტებთან ერთად, პროტესტს უერთდებიან ჰომოფობიური, ქსენოფობიური, ძალადობრივი ჯგუფების ლიდერები, ასევე, მართლმადიდებელთა მშობელთა კავშირი და სხვა სასულიერო პირები. 24 მაისის აქციაზე მივიდნენ სირცხვილიას აქტივისტებიც, თუმცა მათ ძალადობრივი ჯგუფების ლიდერები ლგბტ სამკლაურის გამო დაუპირისპირდნენ, ვარლამ გოლეთიანმა კი ძალადობა ზოგადად დაგმო, თუმცა დაპირისპირების მიზეზად ლგბტ სიმბოლიკა წარმოაჩინა და არა აგრესიული ჯგუფები.

მოთხოვნები, რომლებიც ვარლამ გოლეთიანმა აქციაზე გააჟღერა, შემდეგია:

  • დატოვოს რიონის ხეობა კომპანიამ ენკამ;
  • გაწყდეს ენკასა და სახელმწიფოს შორის დადებული ხელშეკრულება და გაუქმდეს ყველა ის დოკუმენტი, რომელიც 2015 წლიდან დღემდეა გაცემული;
  • გამოცხადდეს მორატორიუმი ენერგოსექტორში;
  • გადადგეს ეკონომიკის მინისტრი და დადგეს არამხოლოდ ნათია თურნავას, არამედ ჰესის დოკუმენტაციის მომზადებაში ჩართული ადამიანებიც პასუხისმგებლობის საკითხი.

აქციის ორგანიზატორებმა ამ მოთხოვნების შესასრულებლად ხელისუფლებას ვადა 24 მაისის 12:00 საათამდე მისცა, წინააღმდეგ შემთხვევაში კი, დედაქალის პარალიზება დააანონსეს.

ნამახვანჰესის მოწინააღმდეგეებმა პროტესტის დედაქალაქში გადმოტანის გადაწყვეტილება უშედეგო მოლაპარაკებების შემდეგ მიიღეს. მთავრობამ მათ ჰესის მშენებლობაზე ერთი წლის განმავლობაში მორატორიუმი შესთავაზა, თუმცა მოსამზადებელ სამუშაოები არ გაჩერებულა.

პროტესტის თავდაპირველი ადგილი სოფელი ნამოხვანია, სადაც რამდენიმე თვის განმავლობაში ისინი ჰესის მშენებლობას უწყვეტად აპროტესტებენ. მათ ადგილზე კარვები ჰქონდათ გაშლილი.

ისინი ამბობენ, რომ ეკოლოგიური საფრთხის გარდა, მთავრობამ მშენებელ კომპანიასთან გაფორმებული ხელშეკრულებით სახელმწიფო ინტერესები დათმო.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობს ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.

რიონის ხეობაში ჰესს კომპანია ენკა აშენებს. ENKA აცხადებს, რომ ნამახვანჰესის პროექტი დეტალურადაა შესწავლილი და რაიმე საფრთხეს მოსახლეობისთვის ან ხეობისთვის არ წარმოადგენს.

გაიგე მეტი: