კახა კალაძე აპირებს წარადგინოს ანგარიში, რა გააკეთა მერობის პერიოდში. ამის შესახებ მან დღეს თბილისის მთავრობის სხდომაზე განაცხადა.

კახა კალაძის თქმით, 2017 წელს, როცა მერად ირჩევდნენ, საზოგადოებას წარუდგინეს ხედვა იმ მიმართულებებზე, რომლებიც თბილისის მოსახლეობას ყველაზე მეტად აწუხებდა: ურბანული განვითარების, სატრანსპორტო, ეკოლოგიური, სოციალური, განათლების, კულტურის, სპორტისა და ახალგაზრდობის, ეკონომიკური და მართვის პოლიტიკა. კალაძე ამბობს, რომ ანგარიშს სწორედ ამ 7 მიმართულებით წარადგენს და პრეზენტაციები კვირაში ერთხელ იქნება.

"2017 წელს ჩვენ თბილისის მოსახლეობამ ოთხი წლის ვადით აგვირჩია. ეს მანდატი წელს ოქტომბერში იწურება. ვასრულებთ ჩვენს უფლებამოსილებას, რომელიც დედაქალაქის მოსახლეობის უმრავლესობამ მოგვანიჭა. [...] ჩვენ ამ შვიდივე მიმართულებით ძალიან ბევრი და მნიშვნელოვანი პროექტი განვახორციელეთ, მნიშვნელოვანი რეფორმა წამოვიწყეთ, რომელთაგან ზოგიერთი ახლაც განხორციელების პროცესშია. მინდა, ვისარგებლო შემთხვევით და მუნიციპალიტეტის თითოეულ თანამშრომელს მადლობა გადავუხადო იმ საქმიანობისთვის, რასაც ისინი ამ ოთხი წლის განმავლობაში აკეთებდნენ - ღირსეულად ემსახურებოდნენ, ემსახურებიან და მომავალშიც მოემსახურებიან თბილისს და თბილისელებს", — განაცხადა კალაძემ.

მისივე ინფორმაციით, ანგარიშების პრეზენტაცია 18 მაისიდან დაიწყება და თითო პროექტს თითო კვირა დაეთმობა, მოსახლოებას კი პრეზენტაციის შესახებ წინასწარ შეატყობინებენ.

კახა კალაძე თბილისის მერად 2017 წელს აირჩიეს. წელს, 2021 წლის შემოდგომაზე მას ვადა ეწურება და თვითმმართველობის არჩევნები ტარდება. ამ დროისთვის უცნობია, აპირებს თუ არა ის არჩევნებში მონაწილეობას.