საგარეო საქმეთა სამინისტრო კონგოში საქართველოს მოქალაქის ტყვედ ჩავარდნასთან დაკავშირებით აცხადებს, რომ სამინისტრო მუდმივ კონტაქტზეა კონგოს მთავრობასთან.

სამინისტროს ინფორმაციით, სიტუაცია რთულია, ვინაიდან საქართველოს ორი მოქალაქიდან, ერთ-ერთი იმყოფება უკანონო შეიარაღებული დაჯგუფების ტყვეობაში.

22 თებერვალს, საქართველოს საელჩოს პრეტორიაში კონგოს მხარემ მიაწოდა ინფორმაცია, რომ ინციდენტის შედეგად, ოპოზიციურმა დაჯგუფებებმა საქართველოს ერთი მოქალაქე დაატყვევა, ხოლო მეორე მოქალაქე დაიჭრა, თუმცა იგი სამშვიდობოზეა და მკურნალობას გადის აღმოსავლეთ კონგოს ქალაქ გომაში.

მათივე ცნობით, აღნიშნული მოქალაქეების კონგოში ყოფნის ოფიციალური მიზეზი უცნობია:

"როგორც ვიცით ეს პიროვნებები არიან ყოფილი სამხედროები და დამოუკიდებლად იმყოფებოდნენ კონგოში".

კონგოს მხარის ინფორმაციით, ხსენებულ საკითხზე გრძელდება გამოძიება კონგოს შეიარაღებული ძალების შესაბამისი სტრუქტურების მიერ.

საგარეო საქმეთა სამინისტროს განცხადებით, კონგოს მხარე ოფიციალურად ამ დრომდე არ ადასტურებდა საქართველოს მოქალაქის/მოქალაქეების მონაწილეობას ინციდენტში. სამინისტროს ცნობით, არც ოჯახის წევრებს მიუმართავს მათთვის.

საგარეო საქმეთა სამინისტროს მიერ გავრცელებულ განცხადებაში წერია, რომ პრეტორიაში საქართველოს საელჩო რეგულარულ კონტაქტზე იმყოფება კონგოს რესპუბლიკის ხელისუფლებასთან, მას შემდეგ, რაც მიმდინარე წლის იანვარში გავრცელდა ინფორმაცია, რომ მეამბოხეების მიერ ვერტმფრენის ჩამოგდების შედეგად, შესაძლოა დაჭრილთა და დაღუპულთა შორის საქართველოს მოქალაქეებიც იყვნენ.