რუსთაველის გამზირზე ამ წუთებში რუსთავი 2–ის მხარდამჭერი აქცია მიმდინარეობს. აქციის დაწყებისთანავე ტელეკომპანიამ განაახლა ჩვეულ რეჟიმში მაუწყებლობა და მისი ეთერიდან შავი ფონი გაქრა. მხარდამჭერებს პირველმა ზაალ უდუმაშვილმა მიმართა:

"ამ წუთიდან რუსთავი 2 ისევ ჩაირთო, რაც იმის ნიშანია, რომ ეს არხი არასდროს არ უნდა გამოირთოს. დიდი მადლობა ყველას, ვინც ჩათვალა, რომ სიტყვის თავისუფლება ამ ქვეყანაში არის მისი მთავარი ღირებულება და მოვიდა დღეს აქ რუსთავი 2–სა და მაშასადამე, დემოკრატიის დასაცავად. თქვენ რომ გიყურებთ ასე ერთად შეკრებილებს, დარწმუნებული ვარ, რომ რუსთავი 2–სა და სიტყვის თავისუფლებას ამ ქვეყანაში საფრთხე არ ემუქრება".

ზაალ უდუმაშვილის თქმით, რუსთავი 2–ს უკვე 2 წელია "გაუსაძლის პირობებში" უწევს მუშაობა, რაც გულისხმობს მუდმივ შანტაჟს, მუქარას, ყადაღასა და წნეხს:

"დღეს ჩვენ ერთად უნდა ვუთხრათ ამ ხელისუფლებას, რომ ვერასოდეს ვერ შეეხებით ამ ქვეყანაში სიტყვის თავისუფლებას. მერწმუნეთ, რუსთავი 2 თუ დაეცა, ეს არ იქნება მხოლოდ ერთი ტელევიზიის, თუნდაც ყველაზე პოპულარული ტელევიზიის დაცემა, ეს ნიშნავს იმას, რომ შემდეგ, ხვალ, თითოეული ჩვენგანის ოჯახებში შემოვლენ და რასაც უნდა იმას გააკეთებენ. ამ ქვეყანაში სივრცე არ იქნება დატოვებული თქვენი პრობლემების გასაშუქებლად".

უდუმაშვილმა მოსამართლეებს სიმხნევისკენ მოუწოდა. მისი თქმით, მათ უწევთ მნიშვნელოვანი გადაწყვეტილების მიღება, რაც ისე უნდა გააკეთონ, რომ მათი სახელები არ დადგეს ურთმელიძისა და ნაზღაიძის გვარების გვერდით.