საგარეო საქმეთა მინისტრის, დავით ზალკალიანის განცხადებით, მას "არ აინტერესებს" მოლაპარაკებების პროცესში დაზარალდა თუ არა ოპოზიცია. ასე უპასუხა მან იმედის ეთერში ჟურნალისტის კითხვას: "ვინ უფრო დაზარალდა გუშინდელი დღით და უშედეგო მოლაპარაკებებით დასავლეთის თვალში — ხელისუფლება, ოპოზიცია თუ ზოგადად, ქვეყანა?"

"იცით, მე არც მაინტერესებს ახლა ოპოზიცია დაზარალდა თუ არა ამ პროცესში. საზოგადოებამ, მე ვფიქრობ, ძალიან კარგად დაინახა, ვინ იყო კონსტრუქციული, ვინ მიდიოდა პრინციპულად ყველა იმ საკითხის შეთანხმებაზე და ვინ გამოდიოდა ულტიმატუმებით და წინაპირობით. რა თქმა უნდა, ქვეყანა ზიანდება, რა თქმა უნდა, ზიანდება ჩვენი ევროპული და ევროატლანტიკური მისწრაფება. სწორედ ამაშია არსებული მოცემულობის ყველაზე მძიმე მდგომარეობა, ოპოზიცია არაფერს არ აკეთებს იმისთვის, რომ ამ ხელოვნურად შექმნილი სიტუაციიდან გამოიყვანოს ქვეყანა, მაშინ, როდესაც ამდენი უსერიოზულესი გამოწვევაა ქვეყნის წინაშე", — თქვა მან.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. შეხვედრის შემდეგ მხარეებმა ისაუბრეს, რომ იყო საკითხები, რაზეც თანხმდებოდნენ, მაგრამ ნაწილზე — ვერა. მაგალითად, ლელოს ლიდერმა, ბადრი ჯაფარიძემ განაცხადა, რომ ნაციონალური მოძრაობის ლიდერ ნიკა მელიასთან დაკავშირებით შემოთავაზებული იქნა გადაწყვეტილება, რომელიც სრულად პასუხობდა პრობლემის გადაჭრას, თუმცა ეს არ განმეორდა გიორგი რურუას შემთხვევაში.

დანიელსონი მხარეებთან შეხვედრამდე საქართველოს პრეზიდენტს, სალომე ზურაბიშვილს შეხვდა თუმცა შეხვედრის შესახებ პრეზიდენტის ადმინისტრაციას წინასწარ ინფორმაცია არ გაუვრცელებია. ამასთან, შეხვედრის დასრულების შემდეგ, მათ არ გაავრცელეს არც ფოტოები და არც ვიდეო. მიშელის წარმომადგენელი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.