რესპუბლიკური პარტიის თავმჯდომარემ, ხათუნა სამნიძემ, გიორგი გაბუნიას გადაცემა არჩევანში კიდევ ერთხელ დააფიქსირა პარტიის პოზიცია სახელმწიფოს მხრიდან საპატრიარქოს დაფინანსებაზე.

მისი თქმით, ეს პროცესი გამჭვირვალე უნდა იყოს.

"მე ვარ თბილისის საკრებულოს წევრი და სხდომა არ მახსენდება, ყოველ მეორე სხდომაზე ერთ-ერთი საკითხი მუდამ არის მიწის უსასყიდლოდ გადაცემა მართლმადიდებლური ეკლესიისთვის," - აცხადებს ხათუნა სამნიძე.

მისი თქმით, აღნიშნული საკითხების განხილვა არ მიმდინარეობს და ყველა დასმული კითხვა აღიქმება როგორც "მკრეხელობა", "ეკლესიასთან დაპირისპირება" და "ურჯულოება".

სამნიძის თქმით, რესპუბლიკური პარტია მუდამ სპეკულაციების მსხვერპლი იყო, რადგან ეკლესიისა და სახელმწიფოს ერთმანეთისგან დამოუკიდებლობის მომხრეა:

"გამოხეთქა ამ პრობლემამ და ძალიან ღრმა კრიზისმა ეკლესიიდან, ეს კრიზისი ხომ ჩვენმა საუბარმა არ გამოიწვია, ამან თავად ეკლესიიდან გამოხეთქა და ბუნებრივია, ეს მივიდა ამ კონდიციამდე იმის გამო, რომ ძალაუფლებისთვის ბრძოლა მიდის ეკლესიაში, სადაც ძალიან სერიოზული ბიზნესინტერესბია. შერწყმულია საერო და სასულიერო პირების ინტერესები და ეს ჩანს სტატისტიკაში და მთლიანად პოლიტიკურ პროცესში".

რესპუბლიკურმა პარტიამ ხელისუფლებას მართლმადიდებელი ეკლესიის დაფინანსების პოლიტიკის არსებული წესის გადახედვისკენ გუშინ მოუწოდა.