საზოგადოებრივი მაუწყებლის აღმასრულებელი საბჭო საზოგადოებრივი მაუწყებლის განვითარებას არხების რეიტინგის ზრდასა და ხარისხის კონტროლს უკავშირებს და მაუწყებლის განვითარების ხედვას სწორედ ამ ნაწილზე დაყრდნობით ავითარებს. არხის აღმასრულებელ საბჭოში გენერალური დირექტორი - ვასილ მაღლაფერიძე, მიმდინარე და ახალი ამბების ბლოკის დირექტორი - გიორგი გვიმრაძე, მედიისა და კომუნიკაციის ბლოკის დირექტორი - თიკო ბერძენიშვილი, იურიდიული სამსახურის ხელმძღვანელი - ელენა მიხაელოვა და დირექტორის ორი მრჩეველი ია ანთაძე და ნოდარ ჭიჭინაძე შედიან. მათ სამეურვეო საბჭოსთვის დასამტკიცებლად წარდგენილი სამოქმედო გეგმის ძირითადი პუნქტები დღეს, 15 თებერვალს გაავრცელეს.

საზოგადოებრივი მაუწყებლის აღმასრულებელ საბჭოს მიაჩნია, რომ ორგანიზაციის რეფორმას საფუძვლად უნდა დაედოს შემდეგი სამი პრინციპი:

1. საზოგადოებრივი მაუწყებელი შეასრულებს კანონით განსაზღვრულ ვალდებულებებს და სამეურვეო საბჭოს მიერ დადგენილ პრიორიტეტებს. მაუწყებელი მუდმივად ორიენტირებულია რეიტინგზე და კერძო მაუწყებლებთან კონსერვაციაში შედის;
2. პირველი არხის რეიტინგი გაიზარდება 15 პროცენტამდე, რაც აისახება მაუწყებლის დებულებაშიც;
3. მაუწყებლის რეიტინგის ზრდის პუნქტის ვერ შესრულების შემთხვევაში, სამეურვეო საბჭომ უნდა დააყენოს გენერალური დირექტორისა და ბლოკის დირექტორების მიმართ ნდობის საკითხი;

ამ პრინციპებიდან გამომდინარე, არხის აღმასრულებელი საბჭო მიიჩნევს, რომ:

• მაუწყებელი ორიენტირებული იქნება მაყურებლის ინტერესისა და რაოდენობის ზრდაზე;
• მკაფიო ინდიკატორით და არა სუბიექტური მოსაზრებებით გადაწყდება, რომელი გადაცემა დარჩება ეთერში და რომელი - შეჩერდება;
• 2018 წლიდან ბადეს დაემატება კონკურსის წესით შერჩეული ახალი გადაცემები და ყოველი სატელევიზიო სეზონის ბოლოს ყველა გადაცემა შეფასდება შეთანხმებული ინდიკატორით;
• რადიოს ახალი კონცეფციის შესამუშავებლად ჩატარდება სამუშაო შეხვედრები, ფოკუს-ჯგუფი და სხვა კვლევები. საზოგადოებრივი რადიოს განვითარება დაეფუძნება იმავე პრინციპებს, რა პრინციპების მიხედვითაც განვითარდება საზოგადოებრივი ტელევიზია.

„სწორედ იმის გამო, რომ აქამდე არ არსებობდა არც საზოგადოებრივი მაუწყებლის საქმიანობის და არც კონკრეტული გადაცემების შეფასების მკაფიო კრიტერიუმები, აღმასრულებელმა საბჭომ თავიდანვე უარი თქვა გადაცემებთან დაკავშირებით სუბიექტური მოსაზრებებით გადაწყვეტილებების მიღებაზე. ჩვენ ავირჩიეთ გზა, რომელიც ყველაზე მეტად უზრუნველყოფს გამჭვირვალობას, სამართლიანობას, კონსენსუსს და თანამშრომელთა უფლებების დაცვას,“ - აღნიშნულია საზოგადოებრივი მაუწყებლის აღმასრულებელი საბჭოს მიერ გავრცელებულ განცხადებაში.