ეკონომიკის მინისტრის, ნათია თურნავას განცხადებით, ოპოზიციის "რადიკალური ნაწილი გათვლას აკეთებს", რომ შეიძლება "რაღაც უბედურება" მოხდეს და 2 თვის თავზე ხალხი გარეთ გამოვიდეს. მისი თქმით, აქ ჩანს ოპოზიციის მცდელობა, რომ "მიეწებონ სხვა მოვლენას". ამის შესახებ მან Postv-ის ეთერში ისაუბრა და ოპოზიციის მიერ დაანონსებული 15 მაისის აქცია შეაფასა.

"ეს ნიშნავს, რომ გამოუვალ მდგომარეობაში არიან [...] ეს არის ყველაზე საწყენი და გულდასაწყვეტი, რომ ჩვენი დღევანდელი ოპოზიცია, მისი რადიკალური ნაწილი გათვლას აკეთებს იმაზე, რომ რაღაც უბედურება იქნებ მოხდეს და ამ იმედად ნიშნავს ორი თვის შემდეგ აქცია, რომ ამ ორ თვეში იქნებადა რაღაცა მოხდეს, დაუშვათ, მესამე ტალღამ დაგვარტყას, ტურიზმი არ აღდგეს ან რაღაც სხვა მოხდეს, სოციალური პროტესტი და მას მივეწებოთო. სწორედ აქაც ჩანს სურვილი, რომ მიეწებო რაღაც სხვა მოვლენას.

როდესაც შენი მომავალი პოლიტიკაში ასეთ გათვლაზე კეთდება, რომ იქნებ და რამე აფეთქდეს და ადამიანები, რომლებსაც არ უნდათ ქუჩაში გასვლა და ეს ნათლად გამოჩნდა არჩევნებზე, რომელიც ყველა საერთაშორისო ორგანიზაციამ სცნო, როგორც ერთ-ერთი ყველაზე დემოკრატიული, სამართლიანი, კონკურენტული. 2 მილიონზე მეტი ადამიანი ამ პანდემიის დროს მივიდა საარჩევნო ყუთთან. გარეთ კი არ გავიდა და ქუჩაში არ გაჰყვა ოპოზიციას, არამედ მივიდა საარჩევნო ყუთთან და ჯამში, 9 პარტიას მისცა ხმა. ეს არის პირდაპირი დაკვეთა, რომ მეგობრებო, შედით პარლამენტში [...] ამის ნაცვლად, ყველა ღონეს ხმარობენ, რომ დარჩნენ გარეთ და იქნებადა რამე აფეთქდეს, 2 თვის თავზე იქნებადა ხალხი გამოვიდეს გარეთ", — თქვა მან.

20 მარტს ოპოზიციამ საკუთარი სამოქმედო გეგმა დააანონსა. ნაციონალური მოძრაობის ერთ-ერთმა წევრმა, ზაალ უდუმაშვილმა თქვა, რომ ისინი მუშაობის "საგანგებო რეჟიმზე" გადადიოდნენ. მისი განცხადებით, აპირებენ ქალაქებსა და სოფლებში ჩასვლას, რათა დაარწმუნონ მოსახლეობა, "რომ ბრძოლას აქვს აზრი". ამასთან, უდუმაშვილი აღნიშნავს, რომ ჩატარდება არაერთი აქცია, მათ შორის, 15 მაისს დიდი აქცია გაიმართება თბილისში.