"ჩემთვისას მოულოდნელი იყო გამეგო, რომ ბოიკოტში ბოიკოტი თუ არსებობდა. როგორც ჩანს ასეთიც არსებობს", — ასე შეაფასა პარლამენტის თავმჯდომარემ, არჩილ თალაკვაძემ ლეიბორისტული პარტიის ლიდერის, შალვა ნათელაშვილის ქმედება, როცა მან კრისტიან დანიელსონის შუამავლობით შეხვედრა დატოვა.

"მეტი შეფასების გაკეთებას მე მოვერიდებოდი. ჩვენ ვართ პოლიტიკური დიალოგის პროცესში. არ მსურს, მეტი დაძაბულობა შევიტანო ამ პროცესში", — აღნიშნა თალაკვაძემ.

დღეს, 17 მარტს გაიმართა პირველი ერთობლივი შეხვედრა ქართულ ოცნებასა და ოპოზიციას შორის, ევროკავშირის წარმომადგენლის, კრისტიან დანიელსონის მონაწილეობით. შვედი დიპლომატი აქამდე მხოლოდ ინდივიდუალურად ხვდებოდა პარტიებს.

შეხვედრა მალევე პროტესტის ნიშნად დატოვა ლეიბორისტული პარტიის ლიდერმა, შალვა ნათელაშვილმა. როგორც მან ჟურნალისტებს უთხრა, შეხვედრას ტოვებს, რადგან პირველ საკითხად რიგგარეშე არჩევნები და პოლიტპატიმრების გათავისუფლება არ განიხილება.

კრისტიან დანიელსონი, რომელიც ევროპული საბჭოს პრეზიდენტის, შარლ მიშელის პირადი წარმომადგენელია ქართულ ოცნებასა და ოპოზიციას შორის მედიაციის პროცესში, მეექვსე დღეა მართავს შეხვედრებს. გარდა პარტიების ლიდერებისა, იგი შეხვდა არასამთავრობო ორგანიზაციების წარმომადგენლებს. ასევე, რამდენჯერმე შეხვდა პრეზიდენტ სალომე ზურაბიშვილსაც.

14 მარტი იყო დანიელსონის ვიზიტის ბოლო დღე საქართველოში, თუმცა, პარტიებთან შეხვედრების შემდეგ, მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

15 მარტს დანიელსონი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

გაიგეთ მეტი: