პარლამენტის ვიცე-სპიკერი, გია ვოლსკი ამბობს, რომ ექვსპუნქტიანი დოკუმენტი, რომელიც ევროპული საბჭოს პრეზიდენტმა, შარლ მიშელმა დატოვა, არა გეგმა, არამედ პრობლემების ჩამონათვალია.

"ექვსპუნქტიანი გეგმა დატოვა, ისე შემოაპარებთ ხოლმე, გეგონება მართლა იმან დატოვა ეს გეგმა. ექვსპუნქტიანი მოთხოვნა, რომელიც, ჩვენი ოპონენტების აზრით, ხელს უშლის მოლაპარაკებათა გაგრძელებას, არ წარმოადგენს გეგმას. ეს არის ის პრობლემების ჩამონათვალი, რომელიც გააკეთა ოპოზიციამ. ამას ვერც გეგმას დავარქმევ და ვერც, მით უმეტეს, ევროკავშირის ან ევროპული სტრუქტურების მხარდაჭერილ დოკუმენტს, ვინაიდან დოკუმენტები ისე მრავლად გამოქვეყნდა, რომ ძილის საშუალებას არ აძლევს თქვენს პოლიტიკურ ლიდერშიპს", — აღნიშნა ვოლსკიმ.

ევროპული საბჭოს პრეზიდენტის წარმომადგენელი, კრისტიან დანიელსონი თბილისს 12 მარტს ეწვია და 14 მარტამდე დარჩება. პოლიტიკურ პარტიებთან დიალოგში მონაწილეობასთან ერთად, ის სამოქალაქო საზოგადოების წარმომადგენლებსაც შეხვდება.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: