გერმანიის საპარლამენტო ასამბლეამ დიდი უმრავლესობით ქვეყნის ახალ პრეზიდენტად ფრანკ-ვალტერ შტაინმაიერი აირჩია. ინფორმაციას ABC ავრცელებს.

შტაინმაიერი გერმანიის ყოფილი საგარეო საქმეთა მინისტრია. მან 1,260-დან 931 ხმა მიიღო.

საარჩევნო ასამბლეა პარლამენტის დაბალი პალატის 630 კანონმდებლითა და გერმანიის 16 შტატის თანასწორი რაოდენობის წევრებისგან შედგება.

გერმანიის პრეზიდენტს არც ისე დიდი ძალაუფლება აქვს, თუმცა დიდი გავლენა აქვს, როგორც მორალურ ავტორიტეტს.

შტაინმაიერი სოციალ-დემოკრატია და მას გერმანიის კანცლერის, ანგელა მერკელის მხარდაჭერა აქვს. აღსანიშნავია, რომ შტაინმაიერი ამერიკის პრეზიდენტის, დონალდ ტრამპის, მხარდამჭერი არაა.

2016 წლის პირველ ივლისს, საქართველოსა და გერმანიის საგარეო საქმეთა მინისტრების ერთობლივ ბრიფინგზე, შტაინმაიერმა განაცხადა, რომ 2017 წელი საქართველო-გერმანიის მეგობრობის წელი იქნებოდა.