ევროკავშირთან ასოცირების საპარლამენტო საბჭოს თანათავმჯდომარე მარინა კალიურანდი და ევროპარლამენტში სოციალ-დემოკრატების წევრის, სვენ მიქსერი საქართველოში განვითარებულ მოვლენებთან დაკავშირებით განცხადებას ავრცელებენ.

სვენ მიქსერის განცხადებით, ელისუფლების წარმომადგენლებს განსაკუთრებული პასუხისმგებლობა ეკისრებათ ამ დაძაბულობის განმუხტვაზე.

"მე არ ვეთანხმები ოპოზიციის ლიდერის, ნიკა მელიას დაპატიმრებას, რაც პოლიტიკურ დაძაბულობას უფრო ზრდის. ხელისუფლების წარმომადგენლებს განსაკუთრებული პასუხისმგებლობა ეკისრებათ ამ დაძაბულობის განმუხტვაზე, კონრეტულ პოლიტიკურ ვითარებაში გამოსავლის პოვნასა და პროვოკაციებზე არაპროპორციულ რეაგირებაზე. მიუხედავად ამისა, მნიშვნელოვანია ხაზგასმით აღვნიშნოთ, რომ საქართველოში პოლიტიკური ვითარება კომპლექსურია, არამარტო შავი და თეთრი", — განაცხადა ევროპარლამენტარმა.

ის, ასევე, მოუწოდებს ოპოზიციას, პარლამენტში შევიდეს, ვინაიდან პარლამენტი ის ადგილია, სადაც პოლიტიკური უთანხმოებები უნდა გადაწყდეს.

"დაძაბულობაა მას შემდეგ, რაც ქართულმა ოცნებამ ნოემბერში საპარლამენტო არჩევნები მოიგო. გარკვეული დარღვევების მიუხედავად, ოდირმა არჩევნები კონკრეტულად შეაფასა, ოპოზიციამ კი არჩევნების მეორე ტურსა და პარლამენტს ბოიკოტი გამოუცხადა. მე მოვუწოდებ ოპოზიციას, რომ დაბრუნდნენ პარლამენტში და ასევე, მოვუწოდებ მათ პარტნიორებს ევროპარლამენტში, მხარი დაუჭიროს ჩემს მოწოდებას. საქართველოს პარლამენტი არის ადგილი, სადაც უნდა გადაწყდეს პოლიტიკური უთანხმოებები და გაგრძელდეს მუშაობა სასამართლო სისტემის რეფორმაზე", — აცხადებს სვენ მიქსერი.

მარინა კალიურანდის განცხადებით, პარტიის პოლიტიკური ბრძოლების ფსონის ამაღლების ნაცვლად, პოლიტიკურმა აქტორებმა საქართველოში ყურადღება იმ ამოცანებზე უნდა გაამახვილონ, რაც ეხება პანდემიის სოციალურ-ეკონომიკურ შედეგებს, პრო-ევროპულ რეფორმებს, დემოკრატიასა და კანონის უზენაესობას.

"ამჟამინდელი პოლიტიკური კრიზისი ხაზს უსვამს სასამართლო რეფორმების გაგრძელების მნიშვნელობას სასამართლო დამოუკიდებლობის გაზრდისა და უმაღლესი სასამართლო სტანდარტების დამკვიდრების მიზნით. ეს განსაკუთრებით ეხება უზენაესი სასამართლოს მოსამართლეების დანიშვნის საკითხს", — აცხადებს კალიურანდი.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.