ნაციონალური მოძრაობის თავმჯდომარის, ნიკა მელიას განცხადებით, სამართალდამცველები ენმ-ს ოფისში კი არ შუსულა, არამედ გადის. მისი თქმით, ეს ხელისუფლება "არაფორმალური მმართველობიდან" მალე გავა. ასე ეხმაურება იგი ოფისში სპეცრაზმის მისვლას.

"შემოდიან არა, გადიან. ეს არ არის შემოსვლა, ეს არის გასვლა. ეს ხელისუფლება გავა არაფორმალური მმართველობიდან და ქართველი ხალხი დაიბრუნებს ძალაუფლებას. რასაც თქვენ დააპირებდით, გავრილოვის გამო არცერთი საქართველოს მოქალაქე არ უნდა სამართლდებოდეს, იმის გამო, რასაც ქართველ ხალხს აკადრეს", — ამბობს ის.

ენმ-ს ოფისში სპეცრაზმი დილით, დაახლოებით, 8-ის ნახევარზე მივიდა. როგორც ადგილზე მყოფი On.ge-ს ჟურნალისტი გვატყობინებს, იქ რამდენიმე ასეული თანამშრომელია და ისინი მთელს პერიმეტრზე არიან განლაგებულნი.

ჩვენივე ჟურნალისტის ცნობით, ენმ-ს ოფისში მყოფი მოსახლეობა ჰიმნის ფონზე დახვდა სამართალდამცველებს. ისინი შენობაში იმყოფებიან და ასეულობით პოლიციელს ხელებაწეულები ხვდებიან.

On.ge-ს ჟურნალისტის ინფორმაციითვე პოლიცია აცხადებს, რომ მელიას სახელზე განჩინებაა გამოცემული, იქ შეკრებილ მოქალაქეებს მოუწოდებს "არ შეუშალონ" მის აღსრულებას ხელი და არ გაუწიონ მათ წინააღმდეგობა.

გუშინ ქართულმა ოცნებამ ირაკლი ღარიბაშვილის მთავრობას ნდობა გამოუცხადა. მანამდე ღარიბაშვილი პარლამენტში სიტყვით გამოვიდა. მისი გამოსვლა შეეხო ნაციონალური მოძრაობის თავმჯდომარის, ნიკა მელიას საქმესაც. მან განაცხადა, რომ მელია "მართლმსაჯულებას ვერ დაემალება", რადგან "კანონი უნდა აღსრულდეს".

"კიდევ ვიმეორებ, ბატონი [ნიკა] მელია, გვარს არ აქვს მნიშვნელობა ამ შემთხვევაში, სადაც არ უნდა იმალებოდეს, იგი ვერ დაემალება მართლმსაჯულებას, კანონი უნდა აღსრულდეს, კანონი აღსრულდება, ისე, როგორც წესია და კიდევ ერთხელ მოვუწოდებ ამ ადამიანებს, რომ დაბრუნდნენ კანონის და კონსტიტუციის ჩარჩოებში", — აღნიშნა მან.

ღარიბაშვილმა ნიკა მელიაზე არა ერთხელ, არამედ მეორედაც ისაუბრა. მან თქვა, რომ "ინდულგენცია არ იქნება რომელიმე პარტიიის თავმჯდომარეობა" და კიდევ ერთხელ გაიმეორა, რომ ისინი "მართლმსაჯულებას თავს ვერ დააღწევენ".

აღსანიშნავია, რომ მელიას დაპატიმრება სწორედ ყოფილი პრემიემინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.