ღამის კურიერის ეთერში ლელოს თავმჯდომარეს, მამუკა ხაზარაძესა და მოქალაქეების ლიდერს, ალეკო ელისაშვილს შორის სიტყვიერი დაპირისპირება მოხდა.

ხაზარაძემ უარყო ელისაშვილის განცხადება იმაზე, რომ ოპოზიციის დახურულ შეხვედრაზე მის კითხვაზე, რა ხდება მეორე სცენარში, უპასუხა: "ომია, ძმაო, და რაღაც იქნება".

"ეს არის ძალიან სამწუხარო ფაქტი, როცა დახურულ შეხვედრაზე ინფორმაცია, სადაც უამრავი ადამიანი ესწრება, გადის დამახინჯებულად. მე მინდა გითხრათ, რომ მსგავსი საუბარი არ ყოფილა", — განაცხადა ხაზარაძემ.

მანვე აღნიშნა, რომ სირცხვილია იმ ინფორმაციის გატანა, რაც არ შეესაბამება სიმართლეს.

"ჩვენ რამეზე შევთანხმდით? ქურდული გარჩევა გვქონდა, თუ პირადი საუბარი გვქონდა? იქ გვქონდა ჩვეულებრივი... ერთადერთი რასაც ვნანობ, რომ მაშინვე არ ჩავრთეთ ყველაფერი პირდაპირ ეთერში. უნდა ხალხმა იცოდეს, ხალხის ზურგს უკან რაზე ვლაპარაკობდით. ისიც უხერხულია, რომ ჩემს სიტყვებს, რომ არ გვილაპარაკია... რა არ გვილაპარაკია, იმდენი ხალხი ვიყავით და ზუსტად მასე მითხარი", — თქვა ელისაშვილმა და ამტკიცებდა, რომ ხაზარაძეს მაშინ უთხრა, რომ ნებისმიერ ომში გაყვებოდა.

პასუხად ხაზარაძემ მოქალაქეების ლიდერს მატყუარა უწოდა, რასაც მათ შორის სიტყვიერი დაპირისპირება მოყვა.

"ძალიან ვერიდებოდი ამ შეფასებას, რაც ახლა მინდა ვთქვა, მგონი ყველაფერს თავისი სახელი უნდა დავარქვათ, თქვენ, ბატონო ალეკო, ბრძანდებით მატყუარა", — განაცხადა მან, რასაც მოყვა ელისაშვილის რეპლიკა: "ცოტა სიტყვები შეარჩიე".

ამის შემდეგ პოლიტიკოსებმა ერთმანეთს "ავანტიურისტი" და "ხალხის მყვლეფავი უწოდეს" და ყვირილზე გადავიდნენ. ელისაშვილმა კამათისას ბადრი ჯაფარიძე ქართულ ოცნებასთან ცალკეულ მოლაპარაკებებში დაადანაშაულა, რასაც ხაზარიძემ მეორე ტყუილი უწოდა და დამტკიცება მოითხოვა.

ხაზარაძემ ელისაშვილს ოპოზიციურ შეხვედრებზე მისვლა აუკრძალა, რაზეც ელისაშვილმა განაცხადა, რომ მას არ შეეკითხებოდა და წარსულში, ბიზნესმენობის დროს მიღებული გადაწყვეტილებების გამო გააკრიტიკა.

"ცოტა ახლოს ხომ არ დაგენახო? ალეკო ვარ ელისაშვილი", — ასე უპასუხა მან ხაზარაძის მიმართვას: "დამანახეთ ეს არარაობა".

პოლიტიკოსები სკამებიდან წამოდგნენ, მათ შორის ტელეწამყვანები, დაცვის წევრი და გირჩის ლიდერი იაგო ხვიჩია ჩადგნენ, რომელიც ამ დროს სტუდიაში იმყოფებოდა.

ელისაშვილმა ყვირილი და ხაზარაძის კრიტიკა გააგრძელა. ეთერი სარეკლამო ჭრით შეწყდა, რის შემდეგაც სდუტიაში მხოლოდ ელისაშვილი და ხვიჩია დაბრუნდნენ.